Connect with us

ទៅលេងឯណា​អីចេះ ចុងសប្ដាហ៍​នេះ

មគ្គទេស​ចុង​សប្ដាហ៍

ទៅលេងឯណា​អីចេះ ចុងសប្ដាហ៍​នេះ

ទៅលេងឯណា​អីចេះ ចុងសប្ដាហ៍​នេះ

ជិត​ដល់ឱកាស​បុណ្យ​អ៊ុំទូក​ហើយ អីចឹង​ភ្នំពេញ​ដឹង​តែ​មិន​ខ្វះអ្វី​លេង​នោះ​ទេ

ថ្ងៃ​អាទិត្យ​ចុង​សប្ដាហ៍​នេះ គឺជា​ថ្ងៃ​ដំបូង​នៃ​ព្រះរាជពិធី​បុណ្យ​អុំទូក​ បណ្ដែក​ប្រទីព និង​សំពះ​ព្រះខែ​ ដែល​មាន​រយៈ​ពេល​ដល់​ទៅ ៣ ថ្ងៃ​ជាប់​គ្នា។ ជាមួយ​នឹង​កម្មវិធី​ដែល​ធ្លាប់​មាន​ប្រចាំ​ឆ្នាំ គឺ​ការ​ប្រណាំង​ទូកងរ​ និង​កម្មវិធី​កម្សាន្ត​ផ្សេង​ៗជាច្រើន​កន្លែង​នៅ​ទីក្រុង។​

 

ក្នុង​រដូវ​កាលខែ​កក្ដិក​​នេះ ខ្យល់​បាន​ធ្លាក់​មក​ពី​ទិស​ខាង​ជើង ធ្វើ​ឲ្យ​ទឹក​ទន្លេ​សាបផ្លាស់​ប្ដូរ​ទិស​ដៅ​នៃ​ទឹកហូរ​ ទៅ​កាន់ភ្ជាប់​ទន្លេ​មេគង្គ​។ ប៉ុន្តែ​នៅ​ពេល​ដែល​ទឹក​ភ្លៀង​ធ្លាក់​មក​ច្រើន ទិស​ដៅ​នៃទឹក​ហូរ​របស់​ទន្លេ​សាប​ នឹង​ផ្លាស់ប្ដូរ​ចរន្ត​ទឹកហូរ​វិញ។ នេះ​គឺ​ជា​ទន្លេ​តែ​មួយ​គត់​លើ​ពិភពលោក​ ដែល​អាច​ផ្លាស់​ប្ដូរ​ទឹកហូរ​បាន​ដូច្នេះ។​​ ​ ​​

 

ដូច្នេះ​ពិធី​បុណ្យ​នេះ​ មិនត្រឹម​តែ​ជា​ពិធីបុណ្យ​ជាតិ​ប្រពៃណី​តែ​ប៉ុណ្ណោះ​ទេ ប៉ុន្តែ​ក៏ជា​ការ​អបអរនៃ​ចុង​បញ្ចប់​របស់​រដូវ​ភ្លៀង​។ នៅ​ទីក្រុង​ភ្នំពេញ កន្លែង​ដែល​ទន្លេ​ទាំង​ពីរ​បាន​ជួប​គ្នា​ ជា​ទីតាំង​ដែល​ធម្ម​ជាតិ​បង្ហាញ​ពី​លក្ខណៈ​ពិសេស​របស់​ខ្លួន​ដែល​អ្នក​មិន​នឹក​ស្មាន​ដល់។

 

ប្រជាជន​ជា​ច្រើន​ទូទាំង​ប្រទេស​ ត្រៀម​ខ្លួន​មក​កាន់​ទីក្រុង​ដើម្បី​ទស្សនា​ការ​ប្រណាំង​ទូក​និង​បណ្ដែត​ប្រទីព​ ក៏ដូច​ជា​ទស្សនា​ភ្លើង​ពណ៌​ក្នុង​ទីក្រុង​ការ​ប្រគំតន្ដ្រី​ជា​ច្រើន​កន្លែងនិង​ការ​បាញ់​កាំ​ជ្រួច​ផង​ដែរ។ ចំណែក​អ្នក​ខ្លះ​ដែល​មិន​ចូល​ចិត្ត​មនុស្ស​ច្រើន​កុះ​កុញ​ ពួក​គេ​នឹង​ត្រៀម​ដំណើរ​កម្សាន្ត​ទៅ​កាន់​កន្លែង​ស្ងប់​ស្ងាត់​ផ្សេងៗ នៅ​តាម​ខេត្ត​ចេញ​ពី​រាជធានី។​ ​​

 

អ្វី​ដែល​គួរ​ឲ្យកត់​សម្គា់​នោះ​គឺ ចុង​សប្ដាហ៍​នេះ​ក៏មាន​ព្រឹត្តិការណ៍​នយោបាយ​សំខាន់មួយ ​បាន​កើត​ឡើង​នៅទីក្រុង​ផង​ដែឬ ដោយ​អ្នក​ដឹក​នាំ​គណបក្ស​ប្រឆាំង​លោក សម​ រង្សី ប្រកាសខ្លួន​ចង់​ត្រលប់​មក​កាន់​ប្រទេស​កម្ពុជា។ ហេតុ​ដូច្នេះ​ហើយ​ទើប​មាន​អ្នក​ទីក្រុង​ជា​ច្រើន សម្រេច​ចិត្ត​មិន​ចេញ​ទៅ​ដើរ​លេង​ខាង​ក្រៅ ជៀស​វាង​ក្រែង​ល៎មាន បញ្ហា​អ្វី​កើត​ឡើង​មិន​ប្រក្រតី។​​​​​​ ​

 

ដូច្នេះ​ហើយ ទើ​ប​ថ្ងៃសុក្រ​និង​ថ្ងៃ​សៅរ៍​ចុង​សប្ដាហ៍​នេះ​ មិន​សូវ​ជា​មាន​អ្វី​កើត​ឡើង​ច្រើន​ប៉ុន្មាន​ទេ នៅ​ក្នុង​ក្រុង​ ប៉ុន្តែ​មាន​ច្រើន​ចាប់​ពី​ថ្ងៃ អាទិត្យ​ ច័ន្ទ អង្គារ ជំនួស​វិញ។ តោះ​អីចឹង​ចាប់​ផ្ដើម។

​​

ថ្ងៃសុក្រ​

 

មាន​អ្វី​លើ​ឆាក​សម្ដែង?

 

នៅ​ Cloud សម្រាប់​រាត្រី​ថ្ងៃ​សុក្រ​នេះ នឹង​មាន​កម្មវិធី​ច្រៀង​ខារ៉ាអូខេ ត្រលប់​មក​វិញ​បន្ទាប់​ពី​ខាន​បាន​ធ្វើ​អស់រយៈ​ពេល​ជា​យូរ។ ក្នុង​រាត្រី​នោះ​ដែរ នឹង​មាន​ដាក់​លក់ស្រា Punch និង​ស្រាលាយក្នុង​តម្លៃ​តែ​ ២ដុល្លារ​ក្នុង​មួយ​កែវ​។ តោះ​អីចឹង​ទៅ​ច្រៀង​លេង​ទាំង​អស់​គ្នា ចាប់​ពី​ម៉ោង ៨ដល់​១១យប់​​ នៅ​ Cloud ផ្លូវ​លេខ ៩។ 

 

ភ្នំពេញ​តែ​ង​តែ​មាន​ក្រុម​មួយ​ដែល​រៀប​ចំ​កម្មវិធី​និយាយ​រឿង​កំប្លែង​បែ​ប​បរទេស គឺ​ក្រុម Comedy in Cambodia។ សម្រាប់​រាត្រី​ថ្ងៃសុក្រ​នេះ នៅ ​Riel Brewing នឹងមាន​កម្មវិធី​មួយ​ហៅ​ថា “Laughter on Tap” ដែល​នឹង​មាន​អ្នក​និយាយ​រឿង​កំប្លែង​ ៣ ទៅ ៤នាក់ អម​ទៅ​ដោយ​ស្រា​បិទថ្មី​ៗ រសជាតិ​ឆ្ងាញ់​មិន​ធម្មតា។ ចំពោះ​តម្លៃ​ចូលរួម​គឺ​មិន​គិត​ថ្លៃ​នោះ​ទេ ត្រៀម​តែ​ប្រាក់​សម្រាប់​ទិញ​ស្រា​ញ៉ាំ​ទៅ​គឺ​បាន​ហើយ។ ចាប់​ពី​ម៉ោង ៧កន្លះ​ដល់ ១០កន្លះ​នៅ Riel Brewing ផ្លូវ​លេខ ៤៦៤។ 

 

មាន​ជម្រើស​ពីរ សម្រាប់​បណ្ដារ​អ្នក​ដែល​ចង់​តែ​អង្គុយ​នៅ​មួយ​កន្លែង​ស្ដាប់​ចម្រៀង​កំដរ​អារម្មណ៍​។ ធ្វើ​ការ​អស់​កម្លាំង​ពេញមួយ​អាទិត្យ​ហើយ អីចឹង​កម្សាន្ត​ចិត្ត​ខ្លះ​ទៅ។​

 

Kristen និង Pavel នឹ​ង​សម្ដែងនៅ Farm to Table សម្រាប់​តន្ដ្រី​បែប​ធ្វើ​ឲ្យ​អ្នក​សម្រួល​អារម្មណ៍​។ តន្ដ្រី​ករ​មួយ​គូរ​នេះ នឹង​ច្រៀង​ចម្រៀង​បែប Gospel-Rhythm និង Blues ពោល​គឺ​ចង្វាក់​បែប​ សេដ សេដ​ហ្នឹង​ហ្ម៎ង​។ ចាប់​ពី​ម៉ោង ៦កន្លះ​ដល់ ៩កន្លះ​នៅ Farm to Table ផ្លូវ​លេខ ៣៦០។ 

 

Alchemy នឹង​មាន​ការ​សម្ដែង​ពី​ក្រុម​ចម្រៀងបែប​ Cover គឺ Antonio and the Experiments។ បើ​ចង់​ដឹង​ថា​ ពួ​ក​គេ​នឹង​ច្រៀង​ Cover បែប​ណា​អាច​ឈ្លប​មក​មើល​លេង​ទាំង​អស់​គ្នា ប៉ុន្តែធានាថា​បទ​ដែល​ពួក​គេ​ជ្រើស​យក​មកសម្ដែង​ លោក​អ្នក​ប្រាកដ​ជា​ដឹង​និង​ចាប់​អារម្មណ៍។ ចាប់​ពី​ម៉ោង ៨ដល់​១១យប់​ នៅ Alchemy ផ្លូវ​លេខ ១២៣។​ 

 

ក្រុមចម្រៀង​បែប ហាដរ៉ុក GC Riders ធ្លាប់​សម្ដែង​នៅ​កម្ពុជា​ម្ដង​រួច​ទៅ​ហើយ​​។ ធ្វើ​ដំណើរ​តាំង​ពី​ប្រទេសផ្សេង​ ស្ទើរតែ​មួយ​ចំហៀង​ទៀត​នៃ​ពិភពលោក ក្រុម​ចម្រៀង​សមាជិក ៥រូប​នេះ​ បាន​ជួប​បង្កើត​ជា​ក្រុម​រួម​គ្នា ដោយ​សារ​ស្រលាញ់​ពេញ​ចិត្ត​នឹង​តន្ដ្រី​ប្រភេទនេះ​ក៏ដូច​ជា​ចូល​ចិត្ត​ក្រុមចម្រៀង​ល្បីៗលំដាប់ ពិភពលោក​ដូច​ជា AC/DC, Metallica និង Judas Priest ជា​ដើម។ បន្ទាប់​ពី​បាន​ជួបគ្នា​នៅ​ប្រទេសវៀត​ណាម ពេល​នេះ​ពួក​គេ​បាន​រួប​រួម​គ្នា​ម្ដង​ទៀត​ហើយ ដែល​នឹង​នាំ​យក​នូវ​ការ​សម្ដែង​នៅ​ ​​​Duplex យប់​នេះ។ ចាប់​ពី​ម៉ោង ៩យប់ដល់ពាក់​កណ្ដាល​អាធ្រាត្រ​នៅ Duplex Taverne ផ្លូវ​លេខ ២៧៨។

 

មាន​អ្វី​ទៀត?

 

មាន​ជម្រើស​ពីរ​សម្រាប់​អ្នក​ចង់​រៀន​រាំ​ចង្វាក់​រាំ​បែប​​ ឡាតាំង​ រាត្រី​នេះ។ នៅ Hey Hey ម្ដុំ​ទួល​ទំពូង​ នឹង​មាន​អ្នក​បង្រៀន​រាំ Lisbet Francis​ បង្ហាត់​បង្រៀន​អ្នក​ពី​ក្បាច់​រាំ​ឡាតាំង​ផ្សេងៗ។ ការ​ហាត់​រាំ​នេះ​គឺ​កំណត់​ឲ្យ​ចូលរួម​តែ​ ៦នាក់​តែ​ប៉ុណ្ណោះ​ អីចឹង​បើ​ចង់​ចូលរួម​ត្រូវ​តែ​កក់ទុក​ជា​មុន។ តម្លៃ​សំបុត្រ​ចូលរួម​គឺ​មាន​តម្លៃ តែ ១០ដុល្លារ បន្ថែម​ជូន​នូវ​ទឹកក្រូច​​ឬ​ស្រាបៀរ​មួយ​កែវ។ ចាប់​ពី​ម៉ោង ៨កន្លះ​ដល់ ៩កន្លះ​នៅ Hey Hey ផ្លូវ​លេខ ១៥៥។

​​  

 

ប្រសិន​ជា​កន្លែង​ទាំង ៦​ខាង​លើ​ អ្នក​សុទ្ធ​តែ​ធ្លាប់​ទៅ​ទាំង​អស់​ហើយ​នោះ អីចឹង​សាកទៅ​កាន់ KWest Restaurant ម្ដុំ​មាត់​ទន្លេ​ម្ដង​មើល៍។ នៅ​ទី​នោះ​ដែរ​នឹង​មាន​តន្ដ្រី​លេង​កំដរ​បែប Tango បន្ថែម​នឹង​ការ​បង្រៀន​រាំ​ក្បាច់​រាំ​ប្រភេទ​នេះ​ទៀត​ផងនៅ​ម៉ោង ៨កន្លះ​យប់។ តម្លៃ​ចូលរួម​កម្មវិធី​នេះ​គឺ​មិន​គិត​ថ្លៃនោះ​ទេ ប៉ុន្តែ​យក​ល្អគួរ​តែ​កក់​កន្លែង​ទុក​ឲ្យ​ហើយ។ ចាប់​ពី​ម៉ោង ៧កន្លះ​ដល់ ១១យប់​នៅ KWest Restaurant ផែស៊ីសុវត្ថិ។

 

មានអ្វី​ដាក់​បញ្ចាំង? 

 

សម្រាប់អបអរ​ព្រះ​រាជពិធី​បុណ្យ​អ៊ុំទូក​ Meta House នឹង​មាន​ដាក់​បញ្ចាំង​រឿង A River Changes Cours ជា​ភាពយន្ត​ឯកសារ​ផលិត​កាល​ពី​ឆ្នាំ ២០១៣ ដែល​និយាយ​អំពីល្បឿនលៀន​នៃ​ការអភិវឌ្ឍន៍​ផ្សេងៗ ជា​ច្រើន​ធ្វើ​ឲ្យ​បរិស្ថាន​កម្ពុជា​ ទទួល​រង​ផល​ប៉ះពាល់​យ៉ាងច្រើន។ ដឹក​នាំ​រឿង​ដោយ​​អ្នក​ដឹកនាំ​ធ្លាប់​ឈ្នះ​ពាន​រង្វាន់អូស្ការ Kalyanee Mam ភាពយន្ត​នេះ​ក៏ទទួ​លបាន​រង្វាន់​ធំ​មួយនៅ​​ក្នុង​មហោស្រព​ភាពយន្ត Sundance Film Festival កាល​ពី​ឆ្នាំ ២០១៣ ផងដែរ។ ចាប់​ពីម៉ោង ៨យប់​ទៅ នៅ Meta House ផ្លូវ​លេខ ១៧៨។​

  ​​ 

មាន​អ្វី​នៅ​យប់​ជ្រៅ?

 

បន្ទាប់​ពី​ទស្សនា​ភាពយន្ត​អម្បាញ់​នេះ​ហើយនៅ Meta House អ្នក​ក៏អាច​ចូលរួម​កម្មវិធី​ជប់លៀង​បន្ទាប់ ជា​កម្មវិធី​រាំ​កម្សាន្ត​ចង្វាក់​អេឡិចត្រូនិច។ DJ ដែល​ជា​ភ្ញៀវកិត្តយស​គឺ Achaya ដែល​ធ្លាប់​ចាក់ភ្លេង​ជា​មួយ Diplo កាល​ពី​លោក​មក​សម្ដែង​នៅ​ប្រទេស​កម្ពុជា​ ព្រមទាំង Major Lazer និង Bert Bevans ជាដើម​។ លោក​នឹង​ចូលរួមចាក់ភ្លេង​ជាមួយ​ DJs Marcus ILL, Nick E, Sao Sopheak ប្រចាំ Meta House តែ​ម្ដង។ មិន​ត្រឹមតែ​សំបុត្រ​ចូលរួម​ Free នោះទេ ទី​នោះ​ក៏មាន​ដាក់​លក់​ស្រាបៀរ​ក្នុងត​ម្លៃ​តែ​ ១ដុល្លារ​ក្នុង​មួយ​កែវ​ផង​ដែរ។ ចាប់​ពី​ម៉ោង ៩យប់​ដល់ ៣ ទៀបភ្លឺ​នៅ Meta House តាម​បណ្ដោយផ្លូវ​ ១៧៨។​ ​​

 

ថ្ងៃសៅរ៍

 

មាន​អ្វី​ដាក់​បញ្ចាំង?

 

ភាពយន្តចិន The Climbers នឹង​ចាប់​ដាក់​បញ្ចាំង​ថ្ងៃនេះ​។ កាល​ពី​ឆ្នាំ ១៩៦០ ក្រុម​អ្នក​ឡើង​ភ្នំបួនរូប​នៃ​ ប្រចាំ​ក្រុម​អ្នកកាម៉ង់ដូ​ឡើង​ភ្នំអេវេរ៉េស​ប្រទេស​ចិន បាន​សាក​ល្បងលើក​ទី​៥ ដើម្បី​ឡើ​ង​ភ្នំដ៏ខ្ពស់​ជាង​គេ​នេះ ឲ្យ​បាន​សម្រេច បន្ទាប់​ពី​បរាជ័យដល់​ទៅ​៤លើក។ ភាពយន្ត​នេះ​និយា​យ​ជា​ភាសាចិន​ ប៉ុន្តែ​មាន​ Subtitles ជា​ភាសាខ្មែរ។ បញ្ចាំង​នៅ​តាម​ម៉ោង​ផ្សេងៗ នៅ​រោងកុន Legend។  ​  

 

សម្រាប់​អ្នក​ចង់​ទស្សនា​ភាពយន្ត​និយាយ​ជា​ភាសាអង់គ្លេស​វិញ គឺ​ទស្សនារឿង The Farewell និយាយ​ពី​ក្រុម​គ្រួសារ​ចិន​មួយ ដែល​ត្រលប់​ទៅ​កាន់​ប្រទេស​ចិន​វិញ​ បន្ទាប់​ពី​ដឹង​ថា ជីដូនរបស់​ពួក​គេ​កំពុង​តែ​ឈឺ​ធ្ងន់។ ប៉ុន្តែពួក​គេ​មិន​បាន​ប្រាប់​ជីដូនថា​នាង​កំពុង​តែ​ឈឺ​នោះ​ទេ ដោយ​ចង់​ចំណាយ​ពេល​គ្រួសារ​ចុងក្រោយ​របស់​ពួក​គេ​ឲ្យ​មាន​ន័យ។ ជា​ភាសា​អង់គ្លេស​និង​ចិន អម​ទៅ​ដោយ​ Subtitles ភាសា​អង់គ្លេស។​

 

មាន​អ្វី​ទៀត?

 

នៅ Pushkin Tattoo Art Studio នឹង​មាន​កម្មវិធី​ជប់លៀង​ខួប​គម្រប់​មួយ​ឆ្នាំ​របស់​ពួក​គេ តាំង​ពី​ថ្ងៃ​ត្រង់​ដល់​ពាក់​កណ្ដាល​អាធ្រាត្រ។ គ្រប់​គ្នា​ដែល​មក​កាន់​ទី​នោះ​នឹង​មាន​ ស្រា​ស្វាគមន៍ ជាមួយ​នឹង​ DJ Dalah, Marie Thach, Jash និង INEE ចាក់ភ្លេង​កំដរ​ដូច​ជា​ការ​តាំង​ពិពរណ៍រូប​ថត​ផ្សេង​ៗ​ ផង​ដែរ។ មិន​ត្រឹម​តែ​ប៉ុណ្ណោះ​ អ្នក​ចូលរួម​នឹង​មាន​ឱកាស​ចាប់​​ឆ្នោត​ដើម្បី​ឈ្នះ​រង្វាន់​ដូច​ជា គូប៉ុង​សម្រាប់​ចាក់សាក់ ក៏ដូច​ជា​របស់របរ​ផ្សេងៗ ទៀត​ផង​ដែរ។ ចាប់​ពី​ម៉ោង ២រសៀល​នៅ Pushkin Tattoo Art Studio ផ្លូវ​លេខ ៣០៨។ 

 

នៅ​ម្ដុំ​ Bassac Lane ដូច​គ្នា Psynovation នឹង​ត្រលប់​មក​កាន់  Party Patio នាំ​មក​យក​នូវ​ស្ទីល​តន្ដ្រី​លាយ​បញ្ចូល​គ្នាពី​ DJ Dalah, Marcus ILL និង Reltho។ ពួក​គេ​នឹង​ចាក់​ភ្លេង​បែប House និង Techno បែប​ថ្មី​ បើ​ចង់​ដឹងកុំភ្លេច​មក​សាកស្ដាប់។ ចាប់​ពី​ម៉ោង ៩យប់​ ដល់​១ទៀបភ្លឺ​នៅ Party Patio ទីតាំងនៅ​តាមផ្លូវ​លេខ ៣០៨។

 

មាន​អ្វី​នៅ​យប់​ជ្រៅ?

 

បទ​ភ្លេង​បែប Underground សម្រាប់​រាំកម្សាន្តនឹង​មក​ដល់​​ Pontoon Pulse យប់​នេះ​ជាមួយ​នឹង​កម្មវិធី​ជប់លៀង​ប្រចាំ​ខែឈ្មោះ​ថា Rhythm Control ដែលជា​បែបបទ​ជប់លៀង​បែបស្គរ 808, 909 និង 303 ជា​ដើម​ ពោលគឺកា​រ​រៀប​ចំ​តម្លើង​គ្រឿង​ភ្លេង​បែប​ ស្គរពីរ​និង​បាស​មួយ។ កម្មវិធី​នេះ​នឹង​ចាក់​តន្ដ្រី​បែប House, Techno, Electro, Acid ពី​សំណាក់​ DJ ចូលរួម​ដូច​ជា Alan Ritchie, Rob Bianche និង Lefty Stryker។ ចាប់​ពី​ម៉ោង ១១យប់​ដល់ ៥ព្រឹក​នៅ Pontoon Pulse ផ្លូវ​លេខ ១៧២។  

 

ថ្ងៃអាទិត្យ

 

ដោយ​ថ្ងៃ​នេះ​គឺ​ជា​ថ្ងៃ​ទី​១ នៃ​កម្មវិធី​បុណ្យ​អុំទូក​ អ្នក​អាច​រក​ទីតាំង​ណាមួយ​នៅ​ម្ដុំ​ផែ ស៊ីសុវត្ថិ ​ដើម្បី​ទស្សនា​ការ​ប្រណាំង​ទូក​ និង​ការ​ដុតកាំជ្រួច​ផង​ដែរ។ និយាយ​ទៅ​នៅ​ទីតាំង​ម្ដុំ​មាត់​ទន្លេ​ និង​ក្បែរ​ព្រះបរមរាជវាំង រាល់​ឆ្នាំ​តែ​ង​តែ​មាន​ដាក់​លក់​អាហារ​ផ្សេងៗជា​ច្រើន អីចឹង​អ្នក​ដឹង​ហើយ​គួរ​តែ​ធ្វើ​យ៉ាង​ណា។​

 

មាន​អ្វី​លើ​ឆាក​សម្ដែង?

 

ក្នុង​រយៈ​ពេល​បី​ថ្ងៃនេះ​ ក្រសួង​បរិស្ថាន​ជាមួយ​និង​អង្គការ​ក្រៅ​រដ្ឋាភិបាល​ជា​ច្រើន​ទៀត​​ បាន​រៀប​ចំ​កម្មវិធី​ប្រគំតន្ដ្រី​មួយ​ឈ្មោះ​ថា ​​1River Music Festival។ កម្មវិធី​នេះ​ប្រមូល​ផ្ដុំទៅ​ដោយ​តារាចម្រៀង​ជា​ច្រើនក្នុង​ស្រុក ក្នុង​គោល​បំណង​ផ្សព្វផ្សាយ​សារ កុំឲ្យ​ប្រើ​ប្រាស់​ផ្លាស្ទិក​ច្រើន​ និង​ដាក់​សម្រាម​ឲ្យ​នៅ​ក្នុ​ង​ធុង​សម្រាម។ ចាប់​ពី​ម៉ោង ៦ដល់ ១០យប់​ នៅ​ខាង​មុខ​ទីតាំង​ក្រសួង​បរិស្ថាន។

 

ក្នុង​ថ្ងៃ​នេះ​ដែរ​ក្រុម​ចម្រៀង​ Small World Small Band នឹង​មាន​កម្មវិធី​សម្ពោធ​អាលប៊ុម​យ៉ាង​កក្រើក​មួយ​ នៅ​ផ្សារ​ទំនើបអ៊ីអន​២។ គូស​បញ្ជាក់ថាក្រុមចម្រៀង​នេះ ទើប​តែ​បាន​សម្ដែង​ជូន​ព្រះ​បាទនរោត្ដម​ សីហមុនី​ ទត​កម្សាន្ត​ថ្មី​ៗនេះ ផង​ដែរ។ សំ​បុត្រ​ចូលរួម​តម្លៃ​តែ ៣ដុល្លារ ចាប់​ពី​ម៉ោង ៤ដល់​​៨ល្ងាច​នៅ Aeon Hall ផ្សារ​ទំនើប​អ៊ីអន​សែន​សុខ។​ ​​

 

មាន​អ្វី​ទៀត?

 

សម្រាប់​អ្នក​ចូល​ចិត្ត​លេង​ហ្គេម​ទូរសព្ទ Mobile Legends: Bang Bang អ្នក​អាច​ចូលរួម​កម្មវិធី​ប្រកួត​គ្នា​ដល់​ទៅ ៣ថ្ងៃ​នៅ វត្ត​បុទុម។ អ្នក​ក៏មាន​ឱកាស​អាច​ជួប​ជាមួយ​អ្នក​ជំនាញ​លេង​ហ្គេម​ក៏ដូច​ជា Vlogger ដូច​ជា Seak Vlogger, Rainie Dara, Henaa Gaming និង SZ_Gamer ជា​ដើម​។ ចាប់​ពី​ម៉ោង ៣រសៀល​ដល់ ៩យប់​នៅ​វត្ត​បុទុម។  

មានអ្វី​ដាក់​បញ្ចាំង? 

 

សម្រាប់​អ្នក​ចូល​ចិត្ត​បាល់ទាត់​វិញ​ម្ដង​ នៅ Cheers Sports Bar នឹង​ចាក់​បង្ហាញ​ពី​ការ​ប្រកួតទី ១២ នៃ English Premier League ខណៈ​ដែល Liverpool និង Man. City នឹង​ប្រកួត​គ្នា​។ ចាប់​ពី​ម៉ោង ៦កន្លះ​ល្ងាច​នៅ Cheers Sports Bar ផែស៊ីសុវត្ថិ។

Continue Reading
You may also like...
Click to comment

Leave a Reply

More in មគ្គទេស​ចុង​សប្ដាហ៍

You Might Like…

អត្ថបទ​សំខាន់​​ និង​ កិច្ចស​ម្ភាសន៍​ផ្សេងៗ

ជួបជាមួយជើងខ្លាំងដែលអ្នកមិនធ្លាប់លឺពីមុនមក គឺអ្នកស្រី សយស្រស់

By ខែ​មិថុនា 15, 2020

Our Writers

Facebook

Take Me To…

To Top