ការណែនាំ និង Reviews ផ្សេងៗ

វិភាគរឿង “Blade Runner 2049” (មិនមាន Spoiler)

What’s on Phnom Penh វិភាគរឿង “Blade Runner 2049” ដែលជាស្នាដៃដ៏ល្អឯករបស់អ្នកដឹកនាំនិងផលិតករល្បីឈ្មោះ Ridley Scott។ ភាពយន្តនេះបានចូលរួមសម្ដែងដោយតារាសម្ដែងល្បីៗជាច្រើនរូបដូចជា Ryan Gosling, Harrison Ford, Ana de Armas, Jared Leto និងRobin Wright ជាដើម។

Thearo Nuch

Published on ខែតុលា 13, 2017

Comment

What’s on Phnom Penh វិភាគរឿង “Blade Runner 2049” ដែលជាស្នាដៃដ៏ល្អឯករបស់អ្នកដឹកនាំនិងផលិតករល្បីឈ្មោះ Ridley Scott។ ភាពយន្តនេះបានចូលរួមសម្ដែងដោយតារាសម្ដែងល្បីៗជាច្រើនរូបដូចជា Ryan Gosling, Harrison Ford, Ana de Armas, Jared Leto និងRobin Wright ជាដើម។

ភាពយន្ត “Blade Runner 2049” គឺវគ្គបន្ទាប់ពីរឿងដំបូង “Blade Runner” ដែលបានបញ្ចេញកាលពីឆ្នាំ ១៩៨២។ ទោះបីជារឿងនេះមិនសូវជាទទួលបានជោគជ័យខ្លាំងចំពោះ Box office តែវាបានក្លាយជាបណ្ដារឿងដែលមានអ្នកគាំទ្ររឿងស្រលាញ់ពេញចិត្តជាច្រើន មិនត្រឹមតែប៉ុណ្ណោះភាពយន្តនេះក៏បានបញ្ចេញជាច្រើនប្រភេទ (Different Cuts Version) រហូតដល់សម្រេចយក(Final Cut) ដែលបានបញ្ចេញកាលពីឆ្នាំ ២០០៧។ រហូតដល់ ៣៥ ឆ្នាំក្រោយ ភាពយន្តដ៏ល្បីរបស់Ridley Scott មួយនេះមានឱកាសបញ្ចេញវគ្គថ្មីដែល មានការចូលរួមដោយលោក Denis Villeneuve ជាអ្នកដឹកនាំរឿង។ ជាមួយនឹងជំនួយរបស់អ្នកជំនាញខាងថតកុនយ៉ាងប្រកបដោយសិល្បៈលោក Roger Deakins នេះគឺជាបទពិសោធន៍រយៈពេល ១៦៤នាទីដែលអ្នកមិនធ្លាប់បានជួប។ ក្នុងសាច់រឿងនោះដែរក៏មានការចូលរួមពីកំពូលអ្នកផលិតសាច់ភ្លេងក្នុងរឿងHan Zimmer នឹងធ្វើឲ្យអារម្មណ៍អ្នករំជើបរំជួលពេលកំពុងទស្សនា។

នៅក្នុងវគ្គថ្មី “BR2049” នេះនឹងបង្ហាញពីហេតុការណ៍ដែលកើតឡើង ៣០ ឆ្នាំបន្ទាប់ពីរឿងដំបូង។ តារាសម្ដែង Ryan Gosling ដើរតួជា ប៉ូលិសប្រចាំទីក្រុង Los Angeless ឈ្មោះ “Officer K” ដែលទទួលបញ្ជាដោយមេការរបស់ខ្លួន អនុសេនីយ៍ Joshi សម្ដែងដោយ Robin Wright។ នៅក្នុងបេសកកម្មរបស់លោក Officer K បានប៉ះជាមួយមនុស្សកែច្នៃឈ្មោះ Sappar Mortonសម្ដែងដោយលោក Dave Bautista ដែលកំពុងតែភ័យខ្លាចក្នុងការតាមប្រមាញ់របស់ពួកប៉ូលិស។ ក្នុងបេសកកម្មនោះ K បានរកឃើញអាថ៌កំបាំងមួយដែលអាចធ្វើឲ្យមានភាគរង្គោះរង្គើនៃជីវិតមនុស្សនិងមនុស្សកែច្នៃ។ បេសកកម្មនោះដែរក៏បាននាំឲ្យ K បានជួបនូវអតីត Blade Runner ម្នាក់ដែលកំពុងតែលាក់ខ្លួន ក្នុងគោលបំណងស្វែងរកចម្លើយជុំវិញបញ្ហាទាំងអស់នោះ។

ប៉ុន្ដែមុននឹងអ្នកចូលទៅកាន់សាច់រឿងឫសម្រេចចិត្តទៅមើលនៅតាមរោងកុន អ្នកគួរតែដឹងថាហេតុការណ៍ទាំងអស់ក្នុងសាច់រឿងគឺកើតឡើងនៅឆ្នាំ ២០៤៩។ អ្នកដឹកនាំរឿង Denis Villeneuve បានសម្រេចចិត្តបញ្ចេញនូវវីដេអូរឿងខ្លីៗចំនួនបីបរិយាយពីហេតុការណ៍កើតឡើងនៅចន្លោះពេលពីរឿងចាស់ឆ្នាំ ២០១៩ និងរឿងថ្មីឆ្នាំ ២០៤៩។

ទី១ “Black Out: 2022” ជាសាច់រឿងគំនូរជីវចលមួយនិយាយពីហេតុការណ៍ដែលធ្វើឲ្យមានការដាច់ភ្លើងដ៏យូរមួយ។ ការផលិតមនុស្សយន្តកែច្នៃគឺត្រូវបានគេហាមឃាត់ និងជាថ្ងៃចុងក្រោយនៃ Tyrell Cooperation។

ទី២ “Nexus Down: 2036” នៅពេលដែល Niander Wallace បានណែនាំនូវប្រភេទមនុស្សកែច្នៃប្រភេទថ្មី។

ទី៣ “2048: Nowhere to Run” ជាហេតុការណ៍កើតឡើងមួយឆ្នាំមុន ២០៤៩ បង្ហាញពីមនុស្សកែច្នៃម្នាក់បានព្យាយាមរត់គេចពីការប្រមាញ់ឈ្មោះ Sappar Morton ដែលសម្ដែងដោយលោក Dave Bautista។

ដោយសារតែសាច់រឿងសរុបក្នុងរឿងនេះគឺដល់ពីរម៉ោងកន្លះឯណោះ ដូច្នេះហើយ BR2049 គឺជាប្រភេទរឿងវិទ្យាសាស្ត្របែប ស្រមើស្រមៃទៅកាន់អនាគតដែលធ្វើឲ្យអ្នកមានអារម្មណ៍ថាកំពុងតែស្ថិតនៅក្នុងពិភពថ្មីមួយ។ លោក Villeneuve គឺពិតជាធ្វើបានល្អខ្លាំងចំពោះរឿងនេះ។ នេះមិនមែនជារឿងដែលគួរឲ្យភ្ញាក់ផ្អើលនោះទេ អ្នកដឹកនាំរូបនេះធ្លាប់ដឹកនាំរឿងល្បីៗជាច្រើនដូចជា “Prisoner” និង “Arrival” ជាដើម។ ព្រមទាំងរួមដៃជាមួយអតីតអ្នកដឹកនាំរឿងចាស់Ridley Scott ជាផលិតករទៀត នោះទើបធ្វើឲ្យរឿងនេះកាន់ល្អមួយកម្រិតទៀត។ ចំណែកឯថវិកាត្រៀមសម្រាប់រឿងនេះវិញគឺដល់ទៅ ១៥០ លានដុល្លារឯណោះ ដូច្នេះត្រៀមខ្លួនត្រៀមPopcorn និង Coca ឲ្យហើយមុននឹងទស្សនាភាពយន្តនេះ។

តើមានអ្វីកើតឡើងក្នុងសាច់រឿងនេះ?

មកដល់ឆ្នាំ ២០៤៩ ក្រុមហ៊ុនផលិតមនុស្សកែច្នៃ Tyrell corporation បានត្រូវបញ្ឈប់ដំណើរការ ដោយលោក Niander Wallace សម្ដែងដោយ Jared Leto បានណែនាំនូវមនុស្សកែច្នៃជំនាន់ថ្មី“NEXUS-9” ដែលជាប្រភេទមនុស្សកែច្នៃដែលគោរពម្ចាស់ជាងគេបង្អស់។ ហេតុនេះហើយទើបធ្វើឲ្យហេតុការណ៍ទាំងអស់ចាប់ផ្ដើមកើតឡើងដោយ មនុស្សកែច្នៃជំនាន់ចាស់ “NEXUS-8” ត្រូវគេចាប់ផ្ដើមប្រមាញ់គ្រប់ទីកន្លែង ដោយអ្នកប្រមាញ់មនុស្សកែច្នៃ (Blade Runner)។ ហើយអ្នកប្រមាញ់ម្នាក់ក្នុងចំណោមនោះគឺលោក K។

ក្នុងសាច់រឿងនោះ K គឺនៅជាមួយសង្សារ ដែលជាបច្ចេកទេសផលិតផល Hologram ឈ្មោះ Joi សម្ដែងដោយ Ana de Armas។ នាងគឺជាសង្សារម្នាក់ដែលតែងតែ សើចលេងសប្បាយជាមួយ R ដើម្បីកែអផ្សុក ជួយធ្វើការនូវអ្វីដែលនាងអាចធ្វើបាន អ្វីដែលសំខាន់បំផុតនោះគឺនាងស្រលាញ់R ខ្លាំង។ ចំពោះតួអង្គចិត្តអាក្រក់សំខាន់ក្នុងរឿងនេះគឺ Luv សម្ដែងដោយ Sylvia Hoeks ដែលជាកូនចៅដ៏ស្មោះត្រង់ចំពោះម្ចាស់របស់ខ្លួនលោក Niander Wallace។ នាងគឺជាមនុស្សកែច្នៃមួយដែលខ្លាំងពូកែ និងឃោរឃៅម្នាក់ ក្នុងចំណោមមនុស្សកែច្នៃទាំងអស់ដែលបានបង្កើតឡើង។ ហើយអ្នករំពឹងថានឹងខ្លាចរអានឹងនាងក្នុងឈុតខ្លះនៅក្នុងរឿងនេះ។

ហើយក្នុងគោលបំណងដើម្បីស្វែងរកចម្លើយនូវអាថ៌កំបាំងនោះ K ត្រូវឆ្លងកាត់ឧបសគ្គជាច្រើនរាប់មិនអស់ រហូតនាំលោកទៅជួបអតីតអ្នកប្រមាញ់មនុស្សកែច្នៃជំនាន់ចាស់ ឈ្មោះ Deckard ធ្វើឲ្យរឿងរ៉ាវកាន់តែច្របូកច្របល់។

បច្ចេកទេសថតភាពយន្តនេះ

នេះមិនមែនជាលើកទី១ ទេដែលលោក Deakins និង Villeneuve ធ្វើការជាមួយគ្នា។ ពួកគេធ្លាប់សហការគ្នាផលិតរឿង ២ដងរួចមកហើយ គឺរឿង “Prisoner” និងរឿង “Sicaro” ដែលរឿងទាំងពីរសុទ្ធតែជារឿងដែលប្រកបទៅដោយលក្ខណៈសិល្បៈភាពយន្ត។ ចំណែកឯស្នាដៃរបស់លោកDeakins សម្រាប់រឿងនេះវិញគឺពិតជាល្អខ្លាំងសឹងមិនគួរឲ្យជឿ។ ឈុតឆាកខ្លះៗពីក្នុងរឿងនេះគឺពិតជាស្រស់ស្អាតចម្លែក រហូតដល់អ្នកគិតថាវេទមន្តនៃភាពយន្តគឺពិតជាមានពិតមែន។ មិនត្រឹមតែប៉ុណ្ណោះអ្នកជំនាញថតភាពយន្តរូបនេះធ្លាប់ជាប់ឈ្មោះដណ្ដើមពានអូស្ការដល់ទៅ ១៣ ដងឯណោះតែមិនដែលឈ្នះ ហើយមនុស្សជាច្រើនជឿជាក់ថាលោកពិតជាឈ្នះពានពីរឿងនេះ។

ការតុបតែងឆាក

ដើម្បីថតឲ្យបានស្អាតគ្រប់ជ្រុងជ្រោយនិងឈុតឆាកក្នុងរឿងនេះ ការរៀបចំតុបតែងឆាកគឺពិតជាសំខាន់ខ្លាំង។ អ្នកដឹកនាំរឿងលោក Villeneuve យល់យ៉ាងច្បាស់ពីបញ្ហានេះ នឹងប្រើប្រាស់ការយល់ដឹងរបស់លោកជាប្រយោជន៍ក្នុងសាច់រឿងនេះ។ វត្ថុផ្សេងៗនៅក្នុងភាពយន្តគឺរៀបចំបានយ៉ាងល្អ ដែលធ្វើឲ្យអ្នកទស្សនាជឿជាក់ថាអ្វីៗទាំងអស់នៅក្នុងកញ្ចក់កុនគឺពិតជាដូចពិតៗ។ លោកគឺជាអ្នកដឹកនាំរឿងម្នាក់នៅក្នុងហូលីវូដ ដែលឲ្យតម្លៃទៅកាន់ការតុបតែងឆាកយ៉ាងខ្លាំង ដោយមិនចង់ឲ្យតួអង្គសម្ដែងតែនៅខាងមុខផ្ទាំងសំពត់ពណ៌បៃតងនោះទេ។ លោកចង់ឲ្យតារាសម្ដែងមានអារម្មណ៍ថាខ្លួនពិតជានៅក្នុងសាច់រឿងពិតប្រាកដ និងទទួលបានបទពិសោធន៍អស់ទាំងនោះផ្ទាល់ៗ។ ហើយអ្វីដែលយើងពេញចិត្តបំផុតនោះគឺ ការបញ្ចូលផ្សែងអ័ព្ទពណ៌ដែលធ្វើឈុតឆាកទាំងឡាយដែលប្រើអ័ព្ទនោះពិតជាស្រស់ស្អាតខ្លាំង។

ការសម្ដែង

ទោះបីជារឿងនេះ ភាគច្រើនត្រូវគេចាត់ទុកថាជារឿងប្រភេទមិនសូវមានសកម្មភាពក៏ដោយ ក៏នៅតែមានឈុតឆាកវាយតប់ខ្លះៗ និងបាញ់ប្រហារខ្លះផងដែរ ជាពិសេសនោះគឺទស្សនារថយន្តចេះហោះពិតជារំភើបខ្លាំង។

លោក Ryan Gosling គឺពិតជាពូកែក្នុងការសម្ដែងលើកដាក់អារម្មណ៍ ក៏ដូចជាសម្ដែងបានយ៉ាងល្អក្នុងឈុតឆាកវាយតប់ និងបាញ់ប្រហារបានយ៉ាងស្ទាត់ជំនាញ មិនត្រឹមតែប៉ុណ្ណោះដោយសារតែរូបរាងដ៏ស្រស់សង្ហារបស់លោក នារីៗជាច្រើនដែលបានចូលទស្សនាភាពយន្តនេះពិតជាពុះកញ្ជ្រោលខ្លាំង។ ចំណែកឯ Sylvia Hoek ដែលសំដែងជាតួអង្គ Luv នោះក៏ពូកែវាយតប់និងកាចខ្លាំង ឈុតខ្លះនាងសម្ដែងបានល្អពេករហូតដល់យើងចំហមាត់ស្ងើចសរសើរនាង។ ចំណែកឯ Anna ដែលសម្ដែងជាតួអង្គ Joy វិញនោះគឺពិតជាមានសម្រស់ស្រស់ស្អាតខ្លាំង ហើយក៏សម្ដែងជាតួអង្គដ៏សំខាន់មួយក្នុងសាច់រឿងផងដែរ។ អត្តចរិតរបស់នាងនៅក្នុងសាច់រឿង ក៏ដូចជាការពូកែធ្វើទឹកមុខគឺជាមូលហេតុមួយដែលធ្វើឲ្យនាងពិតជាលេចធ្លោនៅក្នុងសាច់រឿង។ ចំណែកឯលោក Harrison Ford វិញយើងមិនបាច់និយាយទេ ដោយសារតែលោកពូកែស្រាប់ទៅហើយ។ លោក Jared Leto បានសម្ដែងជាតួអង្គដ៏គួរឲ្យខ្លាចមួយនៅក្នុងរឿងនេះ បើមើលតាមអត្តចរិត របស់តួអង្គ Wallace ផ្ទាល់តែម្ដង ខណៈដែល Robin Wright សំដែងជាតួអង្គមួយយកចិត្តទុកដាក់ទៅលើកិច្ចការរបស់នាង។

សាច់ភ្លេងនៅក្នុងរឿង

លោក Hans Zimmer គឺជាបុគ្គលម្នាក់ដែលល្បីនិងពូកែបំផុតខាងផ្នែកផលិត សាច់រឿងក្នុងភាពយន្ត (Soundtrack)។ លោកបានផលិតបទភ្លេងនៅក្នុងរឿងហូលីវូដល្បីៗជាច្រើន មិនថាជារឿងបែបល្បីទទួលបានពានរង្វាន់អូស្ការឫ ក៏ភាពយន្តដែលរកចំណូលបានកប់ក្ដោងនោះទេ។ ក្នុងរឿង “Blade Runner 2049” នេះលោកបានសហការជាមួយ លោក Benjamin Wallfish ដែលធ្វើឲ្យសាច់រឿង Sci-fi មួយនេះកាន់តែរំជើបរំជួលខ្លាំង។ អ្វីដែលគួរឲ្យកត់សម្គាល់នោះគឺ លោក Johan Johansson បានត្រូវគេជ្រើសរើសឲ្យផលិតសាច់ភ្លេងក្នុងសាច់រឿងនេះ ប៉ុន្ដែក៏ត្រូវបោះបង់ទៅវិញ។ ជម្រើសដែលយើងយល់ថាល្អបំផុតសម្រាប់រឿងនេះគឺបទភ្លេងចំណងជើងថា“Sea Wall” ដែលអ្នកអាចស្ដាប់បានខាងក្រោមនេះ។

ការសម្រេចចុងក្រោយ

Blade Runner 2049 គឺជារឿង១ក្នុងចំណោមរឿងល្អបំផុតដែលបានដាក់បញ្ចាំងក្នុងឆ្នាំនេះ។ ដោយទទួលបានការគាំទ្រក៏ដូចជាកោតសរសើរពីអ្នកស្រលាញ់វិស័យភាពយន្ត និងអ្នកវិភាគគ្រប់ទីកន្លែងទូទាំងពិភពលោក។ រឿងនេះក៏មិនខុសពីវគ្គចាស់ដែរ ដែលធ្វើឲ្យអ្នកទស្សនានៅតែមានចម្ងល់ និងមានរឿងជជែកវែកញែក រាប់សិបឆ្នាំតទៅមុខ។ ចម្ងល់ជាច្រើនពីវគ្គមុនគឺនៅតែមិនទាន់បានបកស្រាយ ហើយស្រាប់តែវគ្គថ្មីនេះកាន់តែបន្ថែមចម្ងល់ជាច្រើនបន្ថែមទៀត។ មូលន័យសម្រាប់រឿងនេះគឺ ក្រើនរំលឹកយើងថាហេតុអ្វីបានភាពយន្តមានសារៈសំខាន់ ហើយអ្វីជាភាពយន្តមានគុណភាព។ ពេលខ្លះវានឹងធ្វើឲ្យអ្នកគិតថា ហេតុអ្វីបានជាអ្នកមានជីវិត តើអ្នកជាអ្នកណាឲ្យពិតប្រាកដ ហើយតើអ្វីជាមូលហេតុធ្វើឲ្យមានបញ្ហាអស់ទាំងនេះ? នេះអាចថាយើងទាំងអស់គ្នាគ្រាន់តែមនុស្សកែច្នៃដែលអ្នកផលិត ផលិតហើយទុកចោលផងក៏មិនដឹង៕