ជំរើសយើង

ស្រាបិត Craft Beer ពិសេសពីផលិតករខ្មែរ សម្រាប់បម្រើអតិថិជនខ្មែរ

អាជីវកម្មស្រាបៀរបិតនៅប្រទេសកម្ពុជាកាន់តែមានភាពរីកចម្រើនគួរឲ្យកត់សម្គាល់ក្នុងរយៈពេលមួយទស្សវត្សកន្លងមកនេះ ប៉ុន្តែវានៅតែមានអារម្មណ៍ថាអាជីវកម្មនេះមានលក្ខណៈភាគច្រើនជាបរទេសជាជាងផលិតក្នុងស្រុក។ ពេលនេះ អ្នកជំនាញខាងបិតស្រានៅក្នុងស្រុកដែលជាជនជាតិខ្មែរផ្ទាល់ បានផលិតស្រាបិត (Craft Beer) ផ្ទាល់ខ្លួនកំពុងតែទទួលបានការគាំទ្រខ្លាំងពីសំណាក់អ្នកចូលចិត្តញ៉ាំស្រាបៀរក្នុងស្រុក។

Amanda Kaufmann

Published on ខែកុម្ភៈ 3, 2021

Comment

ក្នុងពេលដ៏គាប់ជួនមួយ ម្ចាស់់ក្រុមហ៊ុនបិតស្រាក្នុងស្រុកបែប Craft Brewing ទាំងពីររូបបានជួបគ្នានៅប្រទេសកម្ពុជា។ លោក អ៊ុង ជេសុន បានត្រលប់មកពីប្រទែសអូស្ដ្រាលីមកកាន់កម្ពុជាកាលពីឆ្នាំ ២០១៨ ហើយក៏ចាប់អារម្មណ៍ចាប់ផ្ដើមប្រឡូកចូលជាមួយនឹងវិស័យបិតស្រា ដោយក្ដីសង្ឃឹមថាលោកនឹងអាចប្រើប្រាស់ចំនង់ចំនូលចិត្តផ្ទាល់ខ្លួននេះ ទៅជាអាជីវមួយពិតប្រាកដក្នុងប្រទេសកំណើត។ លោកបានកត់សម្គាល់ឃើញថា ចំពោះអាជីវកម្មស្រាបិតបែប Craft Beer នេះសុទ្ធតែកាន់កាប់ដោយជនបរទេសជាជាងប្រជាជនខ្មែរ ដូច្នេះហើយទើបលោកមានគោលបំណងផ្លាស់ប្ដូរ។

“មិនមានកន្លែងបិតស្រារបស់ជនជាតិខ្មែរណា ដែលបិតស្រាបែប Craft beer នោះទេ” លោកបញ្ជាក់ “មានតែក្រុមហ៊ុនផលិតទ្រង់ទ្រាយធំប៉ុណ្ណោះដូចជា Anchor ឬស្រា Cambodia ជាដើម”។

បន្ទាប់ពីពិគ្រោះពិភាក្សាជាមួយម្ចាស់ឧស្សាហកម្មនេះជាច្រើននៅប្រទេសថៃ និង វៀតណាម លោកបានស្វែងយល់ពីការស្វែងរកវត្ថុធាតុដើម និងឧបករណ៍ត្រូវការ ព្រមទាំងកែច្នៃលំនៅដ្ឋានគ្រួសារលោកផ្ទាល់ទៅជាកន្លែងបិតស្រាផងដែរ។ នៅឆ្នាំ ២០១៩ ជាមួយនឹងម៉ាស៊ីនបិតនៅខាងក្រោយ ទីតាំងខាងមុខផ្ទះគឺជាបារបម្រើស្រាបៀរពិសេសមួយ។ លោកហៅឈ្មោះបារនេះថា “Elite Beer” ជាបារតូចមួយសម្រាប់ដាក់លក់ឲ្យអ្នកជិតខាង ក៏ដូចជាមានបម្រើម្ហូបអាហារឆ្ងាញ់ៗផងដែរ។

“បន្ទាប់ពីខ្ញុំបើកបាររយៈពេល២ទៅ៣ខែ គាត់បានមកចូលលេងញ៉ាំស្រា២,៣កែវ” ជេសុន បរិយាយពីពេលដែលលោកបានជួបជាមួយនឹងដៃគូរជំនួញគឺ លោក សុភាន់ ភឿដូរ៉េ (ហៅកាត់ថា ដូរ៉េ)។ ជេសុនបន្ថែមថា “ដូរ៉េគឺរៀងប្លែងបន្តិច ព្រោះលោកគឺជាជនជាតិខ្មែរ ប៉ុន្តែលោកដឹងច្បាស់ថាលោកកំពុងញ៉ាំស្រាបៀរប្រភេទអ្វី។ បន្ទាប់មកខ្ញុំក៏ទៅជិតគាត់ហើយសួរថា ‘ហេតុអ្វីបានលោកដឹងពីស្រា Craft Beer?’”

ជេសុននិយាយបន្ថែមទាំងញញឹមញញែមថា “ព្រោះតែគាត់មើលទៅដូចជាចូលចិត្តញ៉ាំស្រាខ្ញុំខ្លាំង អីចឹងហើយទើបពួកយើងក៏ចាប់ផ្ដើមស្គាល់គ្នា។”

ជាការពិតលោក ដូរ៉េ ធ្លាប់មានបទពិសោធន៍រួចទៅហើយជាមួយនឹងស្រាបៀរបិត តាមរយៈការងាររបស់លោក ដៅយធ្លាប់បានចំណាយពេល “ជាច្រើនខែ” ដើម្បីស្វែងរកនូវវត្ថុធាតុដើមចាំបាច់ ដើម្បីផលិតស្រាបិតមុននឹងលោកបានជួប ជេសុន។ លោកមិនដែលជួបអ្នកផលិតស្រាបៀបិតប្រភេទនេះ ដែលជាសញ្ជាតិខ្មែរពីមុនមកនោះទេ។

ដោយសង្កេតឃើញទេពកោសល្យរបស់ ដូរ៉េ សម្រាប់ស្រា Craft beers ឆ្ងាញ់ពិសារក៏ដូចជាមានបទពិសោធន៍ខាងបិតស្រាផងទៀតនោះ ជេសុន ក៏ស្នើគម្រោងនេះ ដោយចូលរួមគ្នាជ្រោមជ្រែងសម្រាប់អាជីវកម្មមួយ។

បន្ទាប់ពីចាប់ផ្ដើមសហការគ្នាហើយ ដៃគូរទាំងពីររូបនេះបានសម្រេចចិត្តបិតបារ ហើយចាប់សម្រុកផលិតស្រាទាំងស្រុងនៅខែមិនាឆ្នាំ២០២០។ “កាលនោះពួកយើងបិតម្ដងបានតែ២០លីត្រតែប៉ុណ្ណោះ” ជេសុន បញ្ជាក់។ “ឥឡូវនេះយើងបានបិតបានដល់ទៅ១០០លីត្រ ហើយយើងនៅតែមិនមានស្រាគ្រប់គ្រាន់ដើម្បីផ្ដល់ជូនអតិថិជន។”

សម្រាប់ស្រាទាំង១០០លីត្រនេះ គឺត្រូវបានច្រកដបនឹងលក់ទៅកាន់ ភោជនីយដ្ឋាននិងបារ៦កន្លែងនៅភ្នំពេញ ក៏ដូចជាបីនៅកំពតនិងមួយនៅខេត្តបាត់ដំបង។ ពួកគេក៏បានបង្ហាញខ្លួននៅក្នុងកម្មវិធី បុណ្យស្រាបៀរ Oktoberfest ឆ្នាំ២០២០នៅទីក្រុងភ្នំពេញផងដែរ។ នេះបានធ្វើឲ្យអតិថិជននៅទីនោះមានភាពសប្បាយរីករាយ ក៏ដូចជាភ្ញាក់ផ្អើលដោយឃើញ “អ្នកលក់សក់ពណ៌ខ្មៅពីររូប ឈរនៅទីនោះពោរពេញទៅដោយអ្នកមានសក់ពណ៌ក្រហមនិងមាស (សំដៅលើជនបរទេស)”។

“យើងទទួលបាន ការទទួលស្គាល់ក៏ដូចជាកោតសរសើរយ៉ាងច្រើនពីរាត្រីនោះ។” ជេសុន ថ្លែង។ “យើងទទួលបានការសរសើរច្រើន ហើយខ្ញុំពិតជាសប្បាយចិត្តកាលនោះគឺ មិនមែនដោយសារតែពួកយើងប្លែកខុសគេនោះទេ ប៉ុន្តែគឺដោយសារតែអតិថិជននៅទីនោះពេញចិត្តរសជាតិស្រាបៀររបស់ពួកយើង ហើយតែងតែត្រលប់មកទិញថែមទៀត។”

ចំពោះកម្មវិធីដែលនឹងធ្វើឡើងនៅថ្ងៃសុក្រទី៥ខែកុម្ភៈនេះ Elite Cambodian Craft Beer ក៏នឹងមានដាក់លក់នៅបាររបស់ខ្លួនផ្ទាល់គឺតាព្រហ្មផងដែរ ដើម្បីអាចឲ្យអ្នកចូលចិត្តស្រាបៀរបិតថ្មីៗ មកសាករសជាតិ និងដកបទពិសោធន៍ថ្មីៗ។

តាព្រហ្ម ដែលទើបនឹងធ្វើការជួសជុលទីតាំង នឹងមានបង្ហាញពីជញ្ជាំងឥដ្ឋលាបពណ៌សដាក់តាំង ជាមួយនឹងថូផ្ការខ្លះៗនៅទីនោះ ព្រមទាំងមានក្ដារដីសមួយសរសេររៀបរាប់ ពីប្រភេទស្រាបៀរដែលដាក់លក់ ធានាថាប្រកបជាមានបរិយាកាសសប្បាយរីករាយ។

“ត្រឹមតែជាកន្លែងតូចមួយ ដែលអាចឲ្យភ្ញៀវចូលបាននិងចំណាយពេលសប្បាយនៅទីនេះ។ នេះហើយគឺជាគោលបំណង” ដូរ៉េ ថ្លែងដូច្នេះ។

ការសម្រេចចិត្តក្នុងការបើក តាព្រហ្ម មកកាន់សាធារណជនគឺ ចាប់ផ្ដើមដោយក្រុមអ្នកជិះកង់ក្នុងស្រុកមួយក្រុមតែងតែមកកាន់ទីនេះ ហើយពួកគេជានិច្ចកាលគឺតែងតែចង់ញ៉ាំស្រាបៀរដែលបិតថ្មីៗ។

តាព្រហ្មនឹងបើកកម្រើនៅថ្ងៃសុក្រ និងថ្ងៃសៅរ៍ ដោយសម្រាប់ថ្ងៃដើមអាទិត្យគឺផ្ដោតសំខាន់ក្នុងការផលិតស្រាថ្មីៗ។ “អ្វីគ្រប់យ៉ាងពីស្រាបៀរយើងនេះ គឺផលិតដោយដៃ”។ ជេសុន ពន្យល់ ខណៈពេលកំពុងជាប់ដៃរវល់ លោកបន្ថែមថា “គ្មានអ្វីដំណើរការដោយស្វ័យប្រវត្តិនៅទីនេះនោះទេ ពួកយើងបានធ្វើអ្វីៗច្រើនមុខដោយដៃ ដូចជាច្រកដបដោយដៃ នឹងការលាងសម្អាតផ្សេងៗដោយដៃជាដើម។ យើងធ្វើអ្វីគ្រប់យ៉ាងដោយខ្លួនឯង តែពីរអ្នកយើងតែប៉ុណ្ណោះ។”

ខណៈពេលដែលពួកគេមិនមានដើមទុនច្រើន សម្រាប់ពេលនេះ លោកបញ្ជាក់ថា ក្រុមហ៊ុនតូចៗមានអត្ថប្រយោជន៍ល្អៗជាច្រើន “ពីព្រោះ ប្រសិនជាយើងធ្វើម្ដងតែ១០០លីត្រ បើសិនជាមានអ្វីខុសឆ្គងយើងអាចកែប្រែបានដោយងាយស្រួល”។

ការដាក់លក់សាកល្បងនេះនឹងមានការចាក់ Taps ស្រាបួនរសជាតិ ដែលចម្រាញ់ចេញពីវត្ថុធាតុដើមក្នុងស្រុកផ្ទាល់។ នេះហើយទើបពួកគេទទួលបានការគាំទ្រច្រើន ដោយជាក់ស្ដែងស្រាបៀរខ្លះមានរសជាតិ ផ្លែស្វាយ ក៏ដូចជា ក្លិនផ្កាចំប៉ីជាដើម។ អ្វីដែលពិសេសនោះគឺពួកគេក៏មានជម្រើសស្រាបៀរថ្មីពណ៌ផ្កាឈូក សម្រាប់ថ្ងៃបុណ្យនៃក្ដីស្រលាញ់ ផលិតចេញពី ឆៃថាវក្រហម។

ក្រៅពីផលិតស្រាបៀរបិត Craft Beer ផលិតពីវត្ថុធាតុដើមក្នុងស្រុក ដូរ៉េ និយាយថា “បេសកម្មនិងការរំពឹងទុកដ៏ធំមួយ” គឺណែនាំប្រជាជនខ្មែរដើម្បីសាកល្បងនូវ ស្រាបៀរបិតលំដាប់ថ្នាក់ពិភពលោកផងដែរ។ “យើងផ្ដោតសំខាន់លើអតិថិជនខ្មែឬ យើងចង់បង្ហាញពួកគេថា ‘អ្វីទៅជាស្រាបិត Caft Beer’។ ខ្ញុំចាំថាកាលពីខ្ញុំសាកញ៉ាំស្រាបិតលើកដំបូង ក្នុងចិត្តខ្ញុំគិតថា ‘ហេតុអ្វីបានជាស្រាបៀរនេះ មានរសជាតិឆ្ងាញ់ម្ល៉េះ?’” ដូរ៉េ រំឮកទៀតថា លោកមិនដែលសាកបៀររបៀបនេះទាល់តែសោះរហូតដល់លោក ចំណាយពេលដល់ទៅ២០ឆ្នាំ។”

ពួកគេនឹងប្រឈមមុខនឹងឧបសគ្គជាច្រើន ដើម្បីផ្លាស់ប្ដូរប្រជាជនកម្ពុជា ចំពោះចំណង់ចំណូលចិត្តរបស់ពួកគេជុំវិញស្រាបៀរបិត ជាជាងស្រាបៀរដែលពួកគេធ្លាប់តែពិសារក្នុងពេលកន្លងមក។ ឧបសគ្គ៣សំខាន់ៗនោះគឺ៖ ទី១ ស្រាបៀរនេះមានកម្រិតអាល់កុលខ្លាំងបន្តិចជាងស្រាធម្មតា អីចឹងអ្នកពិសារអាចឆាប់ស្រវឹងជាងស្រាធម្មតា។ ទី២គឺរសជាតិប្លែកបន្តិច ហើយទី៣គឺតម្លៃថ្លៃបន្ដិច។ ពីព្រោះសម្រាប់ស្រានេះមួយកែវឬមួយដប មានតម្លៃជាមធ្យម ១ដុល្លារកន្លះ ដែលតម្លៃនេះអាចទិញស្រាបៀរធម្មតា២ទៅ៣កំប៉ុង។

“មិនមែនខ្ញុំមិនធ្លាប់សាកល្បងនោះទេ” ក្នុងការណែនាំប្រជាជនខ្មែរ ឲ្យសាកញ៉ាំស្រាបៀរបិតនេះ លោក ជេសុន បញ្ជាក់ “ប៉ុន្តែវាពិតជាពិបាកខ្លាំងបំផុត។ គឺលំបាកខ្ទង់ ១១០ភាគរយ”។ ជេសុន គិតថា វប្បធម៌កម្ពុជាគឺបន្តរវេនគ្នា ពីជំនាន់មួយទៅជំនាន់មួយ ចំពោះផលិតផលថ្មីអ្វីមួយ ផលិតផលនោះត្រូវតែល្បីឈ្មោះជាមុនសិន ទើបធ្វើឲ្យមានការងាយស្រួលក្នុងការណែនាំ ក៏ដូចជាចែកចាយ។ នេះគឺស្រដៀងនឹងអ្វីដែលកើតឡើងជាមួយស្រាក្រហមដូចគ្នា កាលពីមុនមានតែអ្នកមានតែប៉ុណ្ណោះដែលចូលចិត្តញ៉ាំស្រាក្រហម ឥឡូវអ្នកណាក៏អាចញ៉ាំបានដែរ “ដោយស្រាក្រហមខ្លះដាក់ក្នុងតម្លៃ៥ទៅ៧ដុល្លារ។ អីចឹង Trend នេះក៏អាចកើតឡើងជាមួយស្រាបៀរបិតដូចគ្នា”។

ពួកគេបានសង្កេតឃើញការផ្លាស់ប្ដូរថ្មីមួយដែល ប្រជាជនកម្ពុជា កំពុងតែចាប់ផ្ដើមចូលចិត្តស្រាបៀរបែប រាងធ្ងន់បន្តិចប្រៀបនឹងពីមុន។ ចំពោះការរៀបចំ Elite Beer Bottles ថ្មីៗដាក់នៅក្នុង Menu របស់ហាងកាហ្វេ/បារ ដែលកាន់កាប់ដោយខ្មែរ គឺមានលក្ខណៈពិសេសប្លែកជាជាងកន្លែងដែល កាន់កាប់ដោយជនបរទេស។ អ្វីដែលពិសេសគឺ អតិថិជនក្នុងស្រុកជាច្រើន នឹងចាប់ផ្ដើមចាប់អារម្មណ៍សាកល្បងស្រាបៀរបិត Craft Beer ដូចជាអ្នកញ៉ាំកាហ្វេនៅទីនេះ ផងដែរ។ “ដូច្នេះហើយ នេះគឺជាការសាកល្បងទី១ សម្រាប់អ្នកក្នុងស្រុកសម្រាប់ពួកយើង។” លោក ជេសុន បញ្ជាក់៕

Elite Beer’s Taproom គឺចាប់ផ្ដើមបើកពីម៉ោង២រសៀលដល់៩យប់ ថ្ងៃសុក្រនិងសៅរ៍ មានទីតាំងនៅតាមបណ្ដោយផ្លូវលេខ ៣៥១ ផ្ទះលេខ ១៤៥ វិថី និរោធន៍ ច្បារអំពៅ