អត្ថបទសំខាន់ និង កិច្ចសម្ភាសន៍ផ្សេងៗ

ចាប់ផ្ដើមពីគ្មានអ្វីទាំងអស់ ទៅជាតារាហ៊ីបហប់ល្បីឈ្មោះ: Tiny Toones ប្រារព្ធខួបគម្រប់មួយទសវត្សនៃការធ្វើឲ្យសុបិនក្លាយជាការពិត

អង្គការក្រៅរដ្ឋាភិបាល ផ្តល់ការអប់រំនិងក្បាច់រាំចង្វាក់ breakdancing បានធ្វើឲ្យកុមាររាប់រយនាក់ បានចាកចេញពីចិញ្ចើមផ្លូវនិងមានការងារពិតប្រាកដ។ ពេលនេះពួកគេបានចូលរួម បណ្ដាតារាហ៊ីបហបល្បីៗនៅកម្ពុជាសម្រាប់ការសម្ដែងដ៏ធំសម្បើមមួយ។

Lindsey Kennedy

Published on ខែមិថុនា 29, 2018

Comment

នៅពេលលោក KK ជាជនភៀសខ្លួននៅជំរុុំប្រទេសថៃ ហើយបានធំដឹងក្ដីនៅរដ្ឋ កាលីហ្វ័រញ៉ា ត្រូវបានគេជំលៀសឲ្យមកកាន់ប្រទេសកម្ពុជាវិញកាលពីឆ្នាំ ២០០៥ ពេលនោះអ្វីៗគឺប្រៀបដូចងងឹតសូន្យឈឹង។ នៅពេលធំឡើង លោកត្រូវបានគេហៅថាជាពពួកជើងកាង “the ghetto” នៅទីក្រុង Long Beach។ KK បានពាក់ព័ន្ធនឹងក្រុមជើងកាង កាលលោកនៅវ័យជំទង់ និងធ្លាប់មានបញ្ហាខ្លះៗជាមួយផ្លូវច្បាប់ ធ្វើឲ្យលោកបាត់បង់សិទ្ធិស្នាក់នៅសហរដ្ឋអាមេរិក និងត្រូវបានបញ្ជូនមកកាន់ប្រទេសកម្ពុជាវិញ ជាប្រទេសមួយដែលលោកមិនដែលបានមកកាន់សូម្បីតែម្ដង។

គ្រាន់តែមកដល់ភ្នំពេញភ្លាម លោក KK បានរៀបចំគម្រោងដើម្បីខ្លួនឯង ដោយបានចូលរួមស្ម័គ្រចិត្តធ្វើការជាមួយអង្គការក្រៅរដ្ឋាភិបាលមួួយ ដែលជួយប្រជាជនពីការប្រឈមមុខនឹងមេរោគអេដស៍ និងការប្រើប្រាស់គ្រឿងញៀន។ ក្រោយមក ដោយសារតែមានទេពកោសល្យខាងរាំចង្វាក់ breakdancing ជាស្រេច លោក KK ក៏ត្រូវគេឲ្យបង្ហាត់បង្រៀនក្មេងៗនៅតំបន់នោះ។

ដំបូងឡើយលោកហាក់ដូចជាមានចិត្តចង់ប្រកែក “ប៉ុន្តែក្រោយមកពួកគេក៏នាំក្មេងប្រុសម្នាក់មកជួបខ្ញុំ ហើយពេលនោះខ្ញុំគិតថា ក្មេងម្នាក់នោះពិតជាគួរឲ្យស្រលាញ់មែនទែន ហើយក៏សាកសួរថាអីចឹងប្រាប់ពូមើលចេះអីខ្លះ… ក្មេងនោះរំឭកខ្ញុំពីកូនប្រុសខ្ញុំជាខ្លាំង។”

ចាប់តាំងពីយល់ព្រមដើម្បីបង្ហាត់បង្រៀនក្មេងប្រុសម្នាក់ ពីគំនរសម្រាមដើម្បីរៀនរាំចង្វាក់ breakdance នៅអាគារស្នាក់នៅដ៏តូចចង្អៀតរបស់លោកក្រោយពីបញ្ចប់ការងារមក KK បាននិយាយថាវាពិតជាមានការប្រែប្រួលលឿនខ្លាំងណាស់។ ក្មេងៗកាន់តែច្រើនបានមកសុំការបង្ហាត់បង្រៀនពីលោក ហើយក្រោយពី KK បានដឹងថាក្មេងៗទាំងនោះមិនមានលទ្ធភាពទៅរៀននៅសាលា លោកក៏សុខចិត្តផ្ដល់កន្លែងស្នាក់នៅ អាហារហូបចុក និងព្រមទាំងជួលគ្រូបង្រៀនមួយរូប ដើម្បីបង្រៀនក្មេងៗទាំងនោះនៅពេលថ្ងៃទៀតផង។ ក្រោយមកលោកក៏ទទួលបានទឹកប្រាក់ឧបត្ថម្ភ ដើម្បីជួយជ្រោមជ្រែងការងារ NGO ដោយគ្មានគម្រោងរបស់លោក ទៅជាសាលារៀនផ្លូវការមួយ ពេលនោះហើយគឺជាពេលដែល Tiny Toones ចាប់កំណើតឡើង។

សុបិនពិតជាក្លាយជាការពិតមែន

សព្វថ្ងៃនេះ មានក្មេងៗដល់ទៅ១០០នាក់ឯណោះនៅថ្នាក់រៀន Tiny Toones ច្បារអំពៅ ដែលពួកគេត្រូវបានបង្រៀនមុខវិជ្ជាសំខាន់ៗ បូករួមជាមួយការបង្ហាត់ក្បាច់រាំ និងមេរៀនសិល្បៈផ្សេងៗ។ ទីធ្លាខាងក្រៅនៃសាលានេះគឺពោរពេញទៅដោយ គំនូរស្អាតៗពីអ្នកសិល្បៈតាមដងវិថីដ៏ល្បីៗប្រចាំទីក្រុងភ្នំពេញ ហើយទីតាំងនេះក៏ជាទីតាំងដែលបានបង្កើត អ្នករាំជំនាញជាច្រើនរូប ឌីជេ អ្នកច្រៀងចង្វាក់រ៉េប និងហ៊ីបហប ព្រមទាំងព្យាយាមជួយជ្រោមជ្រែងសិស្សដែលគ្មានលទ្ធភាព ឲ្យបានបន្តការសិក្សាបានខ្ពង់ខ្ពស់ ហើយបានផ្ដល់ការងារទៅពួកគេក្នុងវិស័យហិរញ្ញវត្ថុក៏ដូចជាជំនួញផ្សេងៗ។ អង្គការ NGO នេះបាននិយាយថា ក្មេងៗ៩៦ភាគរយ ដែលបានចូលរៀននៅ Tiny Toones សុទ្ធតែបានការងារធ្វើសមរម្យ។

សម្រាប់លោក KK ការយកចិត្តទុកដាក់ចំពោះក្មេងៗទាំងនេះឲ្យទទួលបានការអប់រំដ៏ល្អ និងបង្ហាត់បង្រៀនឲ្យយកចិត្តទុកដាក់ និងធ្វើការដោយសេចក្ដីព្យាយាមពីពិតជាមានសារៈសំខាន់ មិនចាញ់ការផ្ដល់ចំនេះដឹងនៅមជ្ឃមណ្ឌលនោះទេ។ “សុបិនរបស់ពួកគេ អាចមានច្រើនយ៉ាង ប៉ុន្តែពួកគេត្រូវតែចាប់វាឲ្យបាន” លោកបាននិយាយដូច្នេះ។ “អនាគតរបស់ពួកគេគឺស្ថិតនៅក្នុងដៃរបស់គេ។ វាមិនស្ថិតនៅក្នុងដៃរបស់ខ្ញុំនោះទេ។ ខ្ញុំអាចគ្រាន់តែបញ្ជូនពួកគេឲ្យទៅដល់ចំណុចមួយតែប៉ុណ្ណោះ។”

សារនេះបានធ្វើឲ្យតារារ៉េបល្បីឈ្មោះ Sang Sok Serey រំជួលចិត្តជាខ្លាំង ដោយនាងជាតារាមួយរូបដែលបានសិក្សាជាមួយ Tiny Toones ពេលនាងមានវ័យជំទង់ និងបានស្វែងយល់ថា ទោះបីជាការរាំចង្វាក់ breakdancing មិនមែនជាទេពកោសល្យរបស់នាងប៉ុន្តែនាងអាចច្រៀងរ៉េបយ៉ាងជំនាញ។ បន្ទាប់ពីជម្នះភាពភ័យខ្លាចបានទាំងស្រុង នាងក៏ជម្រុញខ្លួនឯងក្នុងការសម្ដែងរហូតបានសម្រេច។ ៧ឆ្នាំក្រោយមក នាងបានក្លាយជាអ្នកចម្រៀងមានផលិតកម្មពិតប្រាកដ និងក្លាយជាតារាមួយរូបក្នុងចំនោមតារាល្បីៗនៅព្រះរាជាណាចក្រកម្ពុជា ដូចជា Nikki Nikki, ក្មេងខ្មែរ និង ក្រុម Khmer Pride ជាដើម។

“ខ្ញុំបានបង្ហាញថាពួកគេពិតជាខុស” Serey បាននិយាយយ៉ាងអង់អាច នាងក៏បានរៀបរាប់អំពីការរើសអើងភេទ និងភាពលំបាកផ្សេងៗក្នុងការធ្វើឲ្យមានឈ្មោះបោះសំឡេងក្នុងវិស័យសិល្បៈ។ “ខ្ញុំមិនចង់វាយជាមួយមនុស្សនៅខាងក្រៅនោះទេ ប៉ុន្តែខ្ញុំចង់វាយពួកគេតាមរយៈចម្រៀង”។

ពេលនេះ នាងខិតខំប្រឹងប្រែងប្រើប្រាស់ ឃ្លាឃ្លោងនៅក្នុងបទចម្រៀង ដើម្បីផ្ដល់ជាកម្លាំងចិត្តទៅដល់មនុស្សដែលមកពីកាលៈទេសៈលំបាកគ្រប់ប្រភេទ ដើម្បីជម្នះឧបសគ្គផ្សេងៗ និងស្វែងរកកំលាំងចិត្តដើម្បីសម្រេចតាមគោលបំណងដែលចង់បាន។ ចម្រៀងខ្មែរគឺពោរពេញទៅដោយ បទភ្លេងស្នេហាបែបកំសត់ៗ ដែលបង្ហាញពីអារម្មណ៍កណ្ដោចកណ្ដែង និងសូម្បីតែការធ្វើអត្តឃាទទៀតផង។ ក្នុងការចង់ផ្លាស់ប្ដូររសជាតិចម្រៀងបែបនេះ Serey បាននិយាយថានាងចង់ឲ្យតន្ដ្រីរបស់នាងគឺជាភាពផ្ទុយគ្នានៃចម្រៀងទាំងនោះ។ បទចម្រៀងល្បីបំផុតរបស់នាង “The Light” គឺនិយាយអំពីរឿងរ៉ាវរបស់ក្មេងស្រីមួយរូប នាងស្គាល់ ដែលត្រូវបានបោះបង់ដោយឪពុកម្ដាយ និងព្យាយាមរកអ្វីជាទីពំនឹងអាស្រ័យ។ នេះគឺជាបទភ្លេងមួយនិយាយអំពីការរស់រានមានជីវិត និង ការជឿជាក់លើខ្លួនឯង ដែល Serey បានសរសេរមិនមែនត្រឹមតែលើកទឹកចិត្តក្មេងស្រីនោះទេ គឺព្រមទាំងក្មេងៗដទៃទៀតនៅកម្ពុជាដែលជួបនឹងបញ្ហាស្រដៀងគ្នា។

“វាពិតជាធ្វើឲ្យខ្ញុំសប្បាយចិត្តជាខ្លាំង នៅពេលមានអ្នកគាំទ្របាននិយាយថាអរគុណដែលបាននិពន្ធបទនេះឡើង នេះគឺជាអ្វីដែលធ្វើឲ្យពួកគេកាន់តែខ្លាំង” នាងបាននិយាយដូច្នេះ។ “ពេលខ្លះយើងត្រូវបង្ហាញពួកគេពីអ្វីដែលគេអាចធ្វើបាន។ អ្នកគួរតែធ្វើអ្វីដែលអ្នកចង់ធ្វើ និងអ្វីដែលអ្នកស្រលាញ់ពេញចិត្ត… ត្រូវតែតស៊ូ។”

ការជោគជ័យនៅតែបន្ត

ភាពជោគជ័យមួយទៀតគឺ អំពីអ្នករាំចង្វាក់ breakdancer គឺ Slick ដែលបានមកដល់ Tiny Toones តាំងពីអាយុ ១៤ឆ្នាំមកម្ល៉េះ។ Slick បានត្រូវបណ្តេញចេញពីផ្ទះ ដោយសារតែការប្រើប្រាស់គ្រឿងញៀន ហើយមិនមានកន្លែងស្នាក់អាស្រ័យដល់ទៅ ១ឆ្នាំមុនពេលមិត្តភក្តិម្នាក់បានផ្ដល់លេខទូរសព្ទ KK ទៅលោក។

“ខ្ញុំបានឃើញការរាំចង្វាក់ហ៊ីបហប នៅតាមទូរទស្សន៍ ហើយខ្ញុំបានប្រាប់ KK ថាខ្ញុំចង់រៀន។ លោកបានឆ្លើយតបថា ប្រសិនជាខ្ញុំចង់រៀន ខ្ញុំត្រូវតែបញ្ឈប់ការប្រើគ្រឿងញៀន។

វាមិនមែនជាការងាយស្រួលនោះទេ ហើយ Slick បានចំណាយពេលធ្វើទុក្ខជាច្រើនទម្រាំតែផ្ដាច់បានសម្រេច ប៉ុន្តែ KK ដែល Slick បានរៀបរាប់ថាប្រៀបដូចជា ឳពុកចំពោះខ្លួន ជួយជ្រោយជ្រែងលោករហូតមក។ ឥឡូវ Slick បង្រៀនចង្វាក់ breakdancing ទៅកាន់ក្មេងជំនាន់ក្រោយនៅ Tiny Toones ហើយក៏បានក្លាយជាបេក្ខជនមួយរូបនៅក្នុងកម្មវិធី Cambodia’s Got Talent។

“ហ៊ីបហបបានផ្លាស់ប្ដូរជីវិតរបស់ខ្ញុំ។” លោកថ្លែង។

១០ឆ្នាំក្នុងការបង្កើតឡើង

ច្បាស់ណាស់ Tiny Toones ពិតជាមានរឿងរ៉ាវជាច្រើនដើម្បីអបអរ ហើយតារាល្បីៗប្រចាំប្រទេសមួយចំនួនក៏បានចូលរួមផងដែរ។ ថ្ងៃស្អែក អង្គការនេះនឹងប្រារព្ធកម្មវិធីជប់លៀងមួយនៅ The Factory ដែលអាចចូលទស្សនាដោយសេរី ជាមួួយនឹងការសម្ដែងពីតារាល្បីៗដូចជា Sang Sok Serey, KlapYaHandz, 12me. Kreative Kings, Khmer Thorsue, DJ Cake, DJ Niko Yu, DJ Jay, DJ Shadow, DJ B-Roc, Kbach Crew និងជាច្រើនទៀត ព្រមទាំងក្រុមសម្ដែងពី Tiny Toones ផងដែរ។

វាពិតជាគួរឲ្យកោតសរសើរ ចំពោះលទ្ធផលនៃគម្រោងដែលបានបង្កើតមួយទស្សវត្សកន្លងមក ពីខាងមុខបន្ទប់ស្នាក់នៅរបស់ជនដែលត្រូវ ជំលៀសចេញពីប្រទេសក្រៅ និងបារម្ភអំពីឱកាសចុងក្រោយរបស់ខ្លួន។ ប៉ុន្តែ KK បាននិយាយថា “វាគឺការតស៊ូ និងខិតខំប្រឹងប្រែង ហើយខ្ញុំជឿជាក់ថា មនុស្សគ្រប់គ្នាសុទ្ធតែអាចផ្លាស់ប្ដូរបាន… វាមិនមានបញ្ហានោះទេ ថាតើក្មេងម្នាក់មកពីណា អ្វីដែលសំខាន់នោះគឺការបង្ហាញគេឲ្យដឹងថា ក្មេងម្នាក់អាចសម្រេចបានការងារអ្វីទាំងអស់។”