Connect with us

មកជួប​ជើងឯក​កីឡា​ឡើង​ជញ្ជាំង​ថ្មី​សន្លាង​របស់កម្ពុជា

អត្ថបទ​សំខាន់​​ និង​ កិច្ចស​ម្ភាសន៍​ផ្សេងៗ

មកជួប​ជើងឯក​កីឡា​ឡើង​ជញ្ជាំង​ថ្មី​សន្លាង​របស់កម្ពុជា

មកជួប​ជើងឯក​កីឡា​ឡើង​ជញ្ជាំង​ថ្មី​សន្លាង​របស់កម្ពុជា

ទោះ​បី​ជា​កីឡា​ប្រភេទនេះ​ទើប​តែ​មាន​វត្តមាន​នៅ​ក្នុង​ស្រុក​ក៏ពិតមែន ប៉ុន្តែ​កីឡាករ​ឡើង​ជញ្ជាំងកម្ពុជា​ អាច​ចាត់​ចូល​ចំណាត់​ថ្នាក់អន្តរជាតិ​ទៅហើយ មិន​ត្រឹម​តែប៉ុណ្ណោះ​ពួក​គេ​កំពុង​តែ​សំឡឹងមើល​ឱកាស​ចូល​រួម​ប្រកួត​នៅព្រឹតិ្តការណ៍កីឡា​​អូឡាំពិក​ទៀត​ផង។

Translated by Thearo Nuch

English version here >

កីឡាករ​ឡើង​ជញ្ជាំង​ជា​ច្រើន​រូបចម្រុះវ័យ​ មក​ពី​​ទីតាំង​ផ្សេងៗ​នៃប្រទេសកម្ពុជា​ បានមក​ដល់​ទីក្រុង​ភ្នំពេញកាលពីចុង​សប្ដាហ៍ចុងក្រោយខែមិថុនា ដើម្បី​ចូលរួម​ការ​ប្រកួត​ប្រចាំ​ឆ្នាំ​លើក​ទី​ ៣ របស់​កម្មវិធី​ Lotus Cup នៅ Phnom Climb។ កីឡាករ​ចូលរួម​ជាង​១០០នាក់ ក្នុង​កម្មវិធី​នេះបាន​ប្រកួត​ប្រជែង​ដើម្បី​យក​ពាន​រង្វាន់​៣ខុសគ្នា​គឺ ការ​ឡើង​ជញ្ជាំង​បែប Bouldering, Lead Climbing និង Speed Climbing៊។ អ្នក​ដែល​ឈ្នះ​នឹង​ត្រូវ​ទៅ​ប្រកួត​តំណាង​ឲ្យ​ប្រទេស​កម្ពុជា​ប្រចាំ​អាស៊ីនៅ​ប្រទេស​ឥណ្ឌូនេស៊ី​ខែ​វិច្ឆិកា​នេះ។ ចំណែក​ឯអ្នក​ឈ្នះ​ក្រុម​យុវជន នឹង​ត្រូវ​ចូលរួម​ប្រកួត​នៅ​ប្រទេស​ចិន។

Lotus Cup Climbing Competition Phnom Penh 2019

សម្រាប់​កីឡាករវ័យកណ្ដាល​ដែលឈ្នះឆ្នាំ​នេះ​គឺ សរ សីហា  និង យិន ពិសី ដែលបាន​ក្លាយ​ជា​សមាជិក​ផ្លូវការ​នៃ​ក្រុម​តំណាង​ជាតិ​រួច​ទៅ​ហើយ​។ ពួក​គេ​បាន​ចូលរួម​ប្រកួត​ក្នុង​កម្មវិធី Lotus Cup ជា​មួយ​នឹង​សមាជិក​ក្រុម​ ចូ ចាន់នី​ កាល​ពី​ឆ្នាំ​មុន​ផងដែរ​ ​នៅ​ក្នុង​កម្មវិធី Asian Championships នៅ​ប្រទេស​ជប៉ុន។

“នេះ​គឺ​ជា​លើក​ទី​១ហើយ​ ដែលប្រទេស​កម្ពុជា​មាន​ឱកាស​បាន​ចូលរួម ប្រកួត​ក្នុង​កម្មវិធី​ខ្នាត​ធំ​បែប​នេះ។ ទោះ​បី​ជា​ពួក​យើង​មិន​បាន​បញ្ចប់​លក្ខខ័ណ្ឌ​នៃការ​ប្រកួត ក៏​ប៉ុន្តែ​យើង​បានឡើង​សឹ​ង​តែ​ដល់​កំពូលជញ្ជាំង​ទៅ​ហើយ។” ចាន់នី រៀបរាប់​ពី​ប្រកួត​កាលពីឆ្នាំ​មុន។

“យើង​ជា​អ្នក​ប្រកួត​ចុងក្រោយ ប៉ុន្តែមិន​មែន​ចុងក្រោយ​បង្អស់​ទេ ប៉ុន្ដែ​វាក៏ល្អ​ដែរ​។” ពិសី​ បន្ថែម។ “យើង​បាន​យក​ឈ្នះ​អ្នកប្រកួត​ឡើងជញ្ជាំង​ខ្លះ​របស់​ហ្វីលីពីន។ ប៉ុន្តែ​យើង​មិន​អាច​បញ្ចប់​ការ​ប្រកួត​បាន​ ព្រោះ​ជញ្ជាំង​ដែល​យើង​ត្រូវ​ឡើង​វាពិបាក​ពេក។” ​

ប៉ុន្តែ​វា​ក៏​បាន​ផ្ដល់នូវ​បទ​ពិសោធន៍ចំពោះ​អ្នក​ឡើង​ជញ្ជាំង​ ដែល​នឹង​ចូលរួម​ប្រកួតថ្នាក់អន្តរជាតិ​នៅ​ពេលខាង​មុខ​ ក៏ដូច​ជា​ចំពោះ​ការ​ប្រកួត​ផ្សេងៗ​ទៀត។ “ខ្ញុំ​ទើប​តែ​ចាប់​ផ្ដើម​ឡើង​ជញ្ជាំងអស់រយៈពេល៣ឆ្នាំ ដូច្នេះ​យើង​មិន​អាច​ប្រៀបធៀប​ក្រុម​ជម្រើស​ជាតិ​យើង នឹង​ក្រុម​ជប៉ុន​ដែល​បាន​បង្កើត​ជាង​ ៤០ ទៅ ៥០ ឆ្នាំ​នោះ​ទេ​។ ចំពោះ​ការ​ប្រកួត​ខ្នាត​ធំ​នៃ Asian Championships យើង​គ្រាន់​តែ​សង្ឃឹម​ថា យើង​នឹង​ធ្វើ​កាន់​តែ​ល្អ​ជាង​ឆ្នាំ​មុន។” ពិសី រៀប​រាប់ ហើយ​ក៏បន្ថែម​ថា “ហើយ​យើង​ជួប​ជា​មួយជើងឯក​លំដាប់​ពិភពលោក​នៅ​ទីនោះ។ ឃើញពួក​គេ​ឡើង​ជញ្ជាំង​ដោយ​ផ្ទាល់​គឺ​ពិត​ជា ផ្ដល់​ឲ្យ​ការ​ជំរុញ​ទឹក​ចិត្ត​ខ្លាំង​ណាស់។”

 

Cambodian Climbing champions Seyha and Channy

កីឡា​​ឡើង​ជញ្ជាំង​ថ្ម​នេះ បាន​មក​ដល់​កម្ពុជា​កាល​ពី​ឆ្នាំ ២០០៨ ខណៈ​ពេល​ដែល​អង្គការក្រៅរដ្ឋាភិបាលឈ្មោះ Angkor Climbers Net ចាប់​ផ្ដើម​បើក​កន្លែង​ហាត់ប្រាណ​មួយ​នៅ​ខេត្ត​សៀមរាប។ កីឡា​នេះ​ត្រូវ​បាន​គេ​ចាប់​អារម្មណ៍​គួរ​ឲ្យ​កត់​សម្គាល់​នៅ​ក្នុង​ស្រុក ក្នុង​រយៈ​ពេល​មួយ​ទស្សវត្ស​ចុងក្រោយ​នេះ ជា​ពិសេស​បន្ទាប់​ពី​ការ​បង្កើត​ សហព័ន្ធកីឡាឡើង​ជញ្ជាំង​នៅ​កម្ពុជា ដោយ​នាំ​ទៅ​កាន់​ការ​បង្កើត​ក្រុម​ជម្រើស​ជាតិកាល​ពី​២ឆ្នាំ​មុន។ មិន​ត្រឹម​តែ​ប៉ុណ្ណោះ​ ក្រុម​ជម្រើស​ជាតិ​នេះ​ក៏មាន​អ្នក​ឧបត្ថម្ភផ្លូវការ​ផងដែរ​គឺ​ក្រុមហ៊ុន​ជប៉ុន ដែល​មាន​ឈ្មោះថា Taica ដោយ​ចំណាយ​ថវិកាឲ្យ​ក្រុម​នេះចូលរួម​ការ​ប្រកួតប្រជែងផ្សេងៗ។

“ពេល​យើង​បាន​ចូលរួម​ការ​ប្រកួត​ដណ្ដើម​ពាន Asian Championship នៅ​ប្រទេសជប៉ុន ពួក​យើង​ពិត​ជា​សប្បាយរីករាយ​មែន​ទែន។ វា​គឺ​ជា​លើក​ទី​១ សម្រាប់​កម្ពុជា​ក្នុង​ការ​ចូលរួម​ការប្រកួត​ប្រជែង​នេះ។” ជុំវិញអ្នក​ឧបត្ថម្ភ ចាន់នី​ និយាយ​ថា “ទោះ​បី​ជា​ឈ្នះ​ឬ​ចាញ់ ពួក​គេ​នៅ​តែ​សប្បាយ​ចិត្ត ព្រោះ​ពួក​គេ​ដឹង​ថា យ៉ាង​ហោច​ណាស់ក៏មាន​កីឡាករឡើងជញ្ជាំង​នៅ​កម្ពុជា​បាន​ចូលរួម។”

“ក្នុង​នាម​ជា​សមាជិក​ក្រុមជម្រើស​ជាតិ ពិត​ជា​បានជំរុញ​ឲ្យ​ខ្ញុំកាន់​តែ​មាន​ទឹកចិត្ត​ក្នុង​ការ​ឡើងជញ្ជាំង​បន្តទៅទៀត ហើយ​ក៏ល្អ​ដែរដែល​មាន​អ្នក​ប្រកួតប្រជែង​ជាមួយ។” ពិសី បញ្ជាក់។ “ព្រោះ ពេល​នេះ​មាន​អ្នក​ឡើងជញ្ជាំង​ពូកែៗ ជាច្រើន អីចឹងវាកាន់​តែជម្រុញ​ទឹក​ចិត្ត​អ្នក​ខ្លាំង​ជាងមុន ក៏ដូច​ជា​ខំប្រឹង​កាន់​តែ​ខ្លាំង​ឡើង ក្នុង​ការ​ប្រកួត​ប្រជែងម្ដងៗ។”

ទោះ​ជា​យ៉ាង​ណា​ក៏ដោយ ការ​ចាប់​ផ្ដើមពី​​ដំណាក់​កាល​ដំបូង​នៃ​កីឡា​នេះ​នៅក្នុង​ស្រុក មាន​ន័យ​ថា​សមាជីកក្រុមជម្រើស​ជាតិ​កម្ពុជា នឹង​មាន​ឱកាស​ច្រើន​ក្នុង​ការ​ចូលរួម​ប្រកួត​ប្រជែង​ផ្សេងៗទៀត​ ទូទាំងពិភពលោក។ ចំពោះ​ការ​ប្រកួត​ឆ្នាំ​មុន​ក្នុង​កម្មវិធី Asian Championshipps, ពិសី​បាន​បញ្ជាក់​ថា “កីឡាករ​ឡើង​ជញ្ជាំងសញ្ជាតិជប៉ុនទាំង​នោះ សុទ្ធ​តែ​មាន​ហ្វឹកហាត់​តាំង​ពី​អាយុ​ ៥ ៦ឆ្នាំ​មក​ម្ល៉េះ។ ពួក​គេ​មាន​សម្ភារៈគ្រប់គ្រាន់​ក្នុង​ការ​ហ្វឹកហាត់ ខណៈ​ឯ​ពួក​យើង​មិន​មាន​អ្វី​ទាំង​អស់ ដោយ​គ្រាន់​តែ​មាន​ជញ្ជាំង​ ហើយ​ខិតខំ​រៀន​ឡើង​ដោយ​ខ្លួន​ឯង​។ នៅ​ខេត្ត​សៀម​រាប មាន​គ្រូបង្ហាត់​ ២​ ៣ រូប​ប៉ុន្តែ​ពួក​គេ​បង្ហាត់​តែ​មួយ​ថ្ងៃ​បុណ្ណោះ​ក្នុង​មួយ​អាទិត្យ​។ បើ​នៅ​ភ្នំពេញ​វិញ គឺ​គ្មាន​គ្រូ​បង្ហាត់​តែ​ម្ដង។”

ការដែលមាន​គ្រូបង្ហាត់ម្នាក់​ គឺ​ពិត​ជាសំខាន់​ក្នុង​ការ​ធ្វើ​ឲ្យ​សមត្ថភាព​កីឡាករ​រីកចម្រើន។ សីហា និយាយ​ថា ​​​“ឥឡូវ​នេះ​យើង​រៀន​ដោយ​ខ្លួន​ឯង​តែ​ប៉ុណ្ណោះ។ យើង​មិន​មាន​គ្រូបង្ហាត់​ទេ បើ​មាន​គឺ​វា​ពិត​ជា​ល្អ ដោយ​គ្រូ​បង្ហាត់​នឹង​ជម្រុញ​ឲ្យ​ពួក​យើង​ហាត់​កាន់​តែ​ខ្លាំង។​”

ប៉ុន្តែ​ពួក​គេ​ក៏​មិន​អន់​ចិត្ត​ខ្លាំង​ដោយ​តែ​បញ្ហា​នេះ​ដែរ អ្នក​ឡើង​ជញ្ជាំង​ទាំង​នេះ​ ដឹងថា​វា​ត្រូវ​ការ​ពេល​វេលា ដើម្បី​យក​ជ័យ​ជម្នះ​ក្នុង​ការ​ប្រកួត Asian Championship ការ​ប្រកួត World Cup ​​ឬការ​ប្រកួត​អូឡាំពិក ខណ់ៈ​ពេល​ដែល​កីឡា​ឡើង​ជញ្ជាំង​នេះ​នឹង​បង្ហាញ​ខ្លួន​ជា​ព្រឹត្តិការណ៍​មួយ​នៅ​ទីក្រុង​តូក្យូ​ឆ្នាំ ២០២០​ ។ ពិសី ថ្លែង​ថា “វា​គឺ​ជំនាន់​ដំបូង​របស់​យើង ក្នុង​ការ​បង្ហាញ​ពិភពលោក​ថា​ កីឡា​ឡើងជញ្ជាំង​ក៏មាន​នៅ​កម្ពុជា​ដែរ។ ដូច្នេះ​វា​មិន​សំខាន់​ទេដែល​យើង​នឹង​អាចយកឈ្នះ​​គេ​បាន ព្រោះ​យើង​អាច​ស្មាន​ដឹង​ពី​លទ្ធផល​ទៅ​ហើយ។ យើង​មិន​អាចប្រកួត​ប្រជែង​ជា​មួយ​អ្នក​ឡើង​ជញ្ជាំង​ទាំង​នោះ ប៉ុន្តែ​វា​ពិត​ជា​សំខាន់​ក្នុង​ការ​បង្ហាញ​ថា​ប្រទេសកម្ពុជា​ក៏មាន​វត្តមាន​នៅ​ទី​នោះ។” 

នាង​បន្ថែម​ថា “ប៉ុន្តែ​យើង​មាន​សង្ឃឹម​ចំពោះ​កីឡាករ​ជំនាន់​ក្រោយ​ ដែល​អាច​យក​ឈ្នះ​ពួក​កីឡាករ​ទាំង​នោះ​បាន។”

 

Lotus Cup Climbing Competition Phnom Penh 2019

ក្នុង​រយៈ​ពេល​២ថ្ងៃ​នៃការ​ប្រកួត Lotus Cup នឹង​ធ្វើ​ទៅ​តាម​ច្បាប់​ថ្មី​នៃ​ផ្នែកកីឡា​ឡើង​ជញ្ជាំង​ ប្រចាំ​អូឡាំពិក។ សម្រាប់ Bouldering និង Lead Climbing កីឡាករ​ឡើង​ជញ្ជាំង​នីមួយៗ មាន​រយៈ​ពេល​៤នាទី ក្នុង​ការ​ឡើង​ឲ្យ​ដល់​ចំណុច​កំពូល ហើយ​អ្នក​ដែល​បានឡើង​ដល់​ចំណុ​ច​កំពូល​មុន​គេ​ នឹង​ទទួល​បាន​ពិន្ទុ​ច្រើន​បំផុត។ ប៉ុន្តែ​អ្នក​ប្រកួត​ប្រជែង​ មិន​អនុញ្ញាតិ​ឲ្យ​សម្លឹង​មើល​គ្នា​ពេល​កំពុង​ឡើង​នោះ​ឡើយ​។ ផ្ទុយ​ទៅ​វិញ​ ពួក​គេ​អាច​សម្លឹង​មើល​កាលៈទេសៈ​ស្ថានភាព​នៃ​ជញ្ជាំង​ដែល​គេ​នឹ​ង​ត្រូវ​ឡើង។ សម្រាប់ Bouldering វិញ ពួក​គេ​ក៏​បាន​អនុញ្ញាតិ​ឲ្យ​ស្ទាប តែ​ចំណុច​ដំបូង​តែ​ប៉ុណ្ណោះ ដើម្បី​ឲ្យ​មាន​ភាព​ងាយ​ស្រួល​ក្នុង​ការ​រក​ផ្លូវ​​ឡើង​ដែល​ល្អ​ជាង​គេ។ 

“ហើយ​ចំពោះ​អ្នក​ចូលរួម​ទស្សនា​វិញ វា​ពិត​ជា​រំភើប​មែន​ទែន ព្រោះ​ពួក​គេ​បាន​ឃើញ​អ្នក​ឡើង​ពីមុន ឡើង​ដោយ​ប្រើ​មធ្យោបាយ​ផ្សេង ហើយ​អ្នកឡើង​ក្រោយ​នឹង​ប្រើ​វិទ្យាសាស្ត្រ​ថ្មី​។ ដូច្នេះ​វា​ពិត​ជា​កីឡា​មួយ ដែល​សប្បាយ​ភ្នែក​ក្នុង​ការ​ទស្សនាយ៉ាង​ខ្លាំង។” នេះ​បើ​តា​ម​លោក Edward Anderson ដែល​ជា​អ្នក​រៀប​ចំ​កម្មវិធី​ឆ្នាំ​នេះ។​

ការ​ប្រកួត​ប្រជែង​ឆ្នាំ​នេះ គឺ​មាន​លក្ខណៈ​ប្រផិតប្រផើយ​ខ្លាំង​ចំពោះ​អ្នក​ឡើង​ជញ្ជាំងកំពូល។ សីហា និង ចាន់នី  ដែល​សុទ្ធ​តែឈ្នះ​ក្នុង​វិញ្ញាសា​ផ្សេង​គ្នា ចំពោះ​ផ្នែក Lead Climbing និង Bouldering។ ចំពោះ​ឯ​បេក្ខភាព​ខាង​នារី​វិញ យប់​ថ្ងៃ សៅរ៍​ពិត​ជា​យប់មួយ​សំខាន់​សម្រាប់​អ្នក​ទាំង​ពីរ​ ដោយ ពិសី និង​ មាស​ និច្ច សុទ្ធ​តែ​ឈ្នះ​មួយ​វិញ្ញាសារ​ម្នាក់​ដូច​គ្នា ប៉ុន្តែ​រក​ចាំ​លទ្ធផល​នៃ ការ​ឡើង Bouldering Round ដើម្បី​កំណត់​យក​អ្នក​ឈ្នះ​ពិត​ប្រាកដ ដោយ​ជ័យលាភីបាន​ទៅលើ ពិសី។

អ្នក​ចូលរួម​ប្រកួត​ ក៏បាន​បង្ហាញ​ពី​ស្ថាន​ភាព​នៃ​កីឡាករ​ជំនាន់​ក្រោយ​ផង​ដែរ ដោយ​ក្នុង​ចំណោម​អ្នក​ចូល​រួម ១០២ រូប​ ៧០ភាគរយ​គឺ​សុទ្ធ​តែ​អ្នក​មាន​វ័យ​ក្រោ​ម​១៨​ឆ្នាំ ហើយ​គ្រប់គ្នា​សុទ្ធ​តែ​ជា​សញ្ជាតិ​ខ្មែរ៕

 

Click to comment

Leave a Reply

More in អត្ថបទ​សំខាន់​​ និង​ កិច្ចស​ម្ភាសន៍​ផ្សេងៗ

You Might Like…

អត្ថបទ​សំខាន់​​ និង​ កិច្ចស​ម្ភាសន៍​ផ្សេងៗ

មកជួប​ជើងឯក​កីឡា​ឡើង​ជញ្ជាំង​ថ្មី​សន្លាង​របស់កម្ពុជា

By ខែ​កក្កដា 9, 2019

Our Writers

Facebook

Take Me To…

To Top